جہلم شہر کی معروف سماجی و سیاسی شخصیت سید خلیل حسین کاظمی کی والدہ ماجدہ رضائے الٰہی سے اس دارِ فانی سے رخصت ہو گئیں۔
ایک مہربان، شفیق اور دعا گو ماں کے بچھڑ جانے سے نہ صرف کاظمی خاندان بلکہ پورا علاقہ سوگوار ہو گیا۔ مرحومہ کے انتقال کی خبر پھیلتے ہی اہلِ علاقہ، عزیز و اقارب اور دوست احباب تعزیت کے لیے ان کی رہائش گاہ پر پہنچنے لگے۔
مرحومہ کی نمازِ جنازہ گزشتہ روز جہلم کی مرکزی جنازہ گاہ میں ادا کی گئی، جہاں فضا سوگ، آنسوؤں اور سسکیوں سے بوجھل رہی۔ نمازِ جنازہ میں شہر کی سماجی، رفاحی، فلاحی، مذہبی اور صحافتی تنظیموں کے عمائدین سمیت زندگی کے ہر مکتبِ فکر سے تعلق رکھنے والے افراد نے کثیر تعداد میں شرکت کی، جو مرحومہ اور ان کے خاندان کے حسنِ اخلاق، وقار اور عوامی خدمات کا منہ بولتا ثبوت تھا۔
مرحومہ، جہلم کی معروف مذہبی شخصیت سید فدا حسین مرحوم کی اہلیہ اور سید خلیل حسین کاظمی، سید جلیل حسین کاظمی، سید جمیل حسین کاظمی اور سید شکیل حسین کاظمی کی والدہ تھیں۔ نمازِ جنازہ کے بعد مرحومہ کی مغفرت، درجات کی بلندی اور سوگوار لواحقین کے لیے صبرِ جمیل کی خصوصی دعا کی گئی۔
ہر آنکھ اشکبار اور ہر دل غمگین تھا، جیسے شہر نے اپنی ایک شفیق ماں کھو دی ہو۔ شہر بھر میں مرحومہ کے انتقال پر گہرے دکھ اور افسوس کا اظہار کیا جا رہا ہے جبکہ مختلف سماجی، مذہبی اور سیاسی حلقوں نے کاظمی خاندان سے دلی تعزیت کرتے ہوئے اس ناقابلِ تلافی نقصان پر ہمدردی کا اظہار کیا ہے۔
