جہلم شہر میں دکانداروں نے من مرضی کے نرخ مقرر کر لئے ، قانون نافذ کرنے والے ادارے کے ذمہ داران غائب شہری لٹنے پر مجبور ہیں۔
تفصیلات کے مطابق اندرون شہراور ملحقہ علاقوں میں ضلعی انتظامیہ اور پرائس کنٹرول مجسٹریٹس کی عدم دلچسپی کی وجہ سے دکانداروں نے سبزیوں کے من مرضی کے نرخ مقرر کرکے فروخت شروع کررکھی ہے جس کی وجہ سے غریب سفید پوش طبقہ سبزیاں خریدنے سے بھی عاری ہو چکا ہے۔
سرکاری نرخوںکے مطابق اشیائے خوردو نوش کی فراہمی اعلانوں تک محدود ہو کر رہ گئی ہے ، مرغی کے گوشت کا سرکاری نرخ532 روپے مقرر ہے جبکہ شہر میں550 روپے کا ساڑھے 7 سو گرام فروخت کیا جارہا ہے ، نئے آلو درجہ اول کا سرکاری نرخ120 روپے مقرر ہے جبکہ شہر میں 140 روپے فی کلوگرام تک فروخت کیا جارہاہے۔
پیاز درجہ اول کا سرکاری ریٹ 117روپے کی بجائے 130 روپے فی کلو گرام تک ، ٹماٹر درجہ اول کا سرکاری نرخ 140 روپے کی بجائے 170 روپے فی کلو گرام تک، بینگن کا سرکاری نرخ 65 روپے کی بجائے 80 روپے فی کلو گرام تک ، مٹر کا سرکاری نرخ 200 روپے کی بجائے 250 روپے فی کلو گرام تک فروخت کیا جاتا رہا۔
کریلے کا سرکاری نرخ 95 روپے کی بجائے 130 روپے فی کلو گرام ،پھول گوبھی کا سرکاری نرخ 75 روپے کی بجائے 90 روپے فی کلوگرام، بھنڈی کا سرکاری نرخ 85 روپے کی بجائے 120 روپے فی کلو گرام فروخت کی جاتی رہی۔
شہریوں نے نگران وزیراعلیٰ پنجاب، چیف سیکرٹری پنجاب، کمشنر راولپنڈی اور ڈپٹی کمشنر جہلم سے نوٹس لینے کا مطالبہ کیاہے۔
