آئندہ سال میٹرک اور انٹر کے امتحانات دینے والے طلبا کے لئے بڑی خبر آگئی ہے۔
تفصیلات کے مطابق ملک بھر کے تمام تعلیمی بورڈز کے امتحان میں نمبرز ختم کرتے ہوئے آئندہ سال سے گریڈ سسٹم رائج کرنے کا اعلان کردیا گیا، نئے گریڈنگ فارمولے کے تحت پاسنگ مارکس 40 فیصد ہوں گے۔
انٹر بورڈز کوآرڈینیشن کمیٹی کا کہنا ہے کہ نئے گریڈنگ فارمولے کے تحت پاسنگ مارکس 40 فیصد ہوں گے، پہلے مرحلے میں نویں جماعت اور انٹر پارٹ ون پرطریقہ لاگو کیا جائے گا۔
اُمیدواروں کو رزلٹ کارڈز پر گریڈز کے ساتھ سی جی پی اے دیا جائے گا، انٹر بورڈز کمیٹی نے گزشتہ ماہ اجلاس میں گریڈ سسٹم لانے کا فیصلہ کیا تھا۔
اس کے تحت 95 سے 100 فیصد نمبر حاصل کرنے والے امیدواروں کو اے پلس پلس(A++)گریڈ دیا جائے گا، جبکہ گریڈ پوائنٹ 5 اعشاریہ 0 جی پی اے ہوگا، اسی طرح 90 سے 95 فیصد تک نمبر والوں کو اے پلس گریڈ اور جی پی اے 4 اعشاریہ 7 ملے گا۔
اس کے علاوہ 85 سے 90 فیصد تک نمبر والوں کو اے گریڈ اور 4 اعشاریہ 3 جی پی اے ،80 سے 85 فیصد نمبر لینے والے امیدواروں کو بی پلس پلس (B++)گریڈ اور 4 اعشاریہ 0 جی پی اے،75سے 80 فیصد نمبر والوں کو بی پلس گریڈ اور 3 اعشاریہ 7 جی پی اے، 70 سے 75 فیصد والے نمبروں پر بی گریڈ اور 3 اعشاریہ 3جی پی اے، 60 سے 70 فیصد نمبر تک سی گریڈ اور 3 اعشاریہ 0 جی پی اے،50 سے 60 فیصد نمبروں تک ڈی گریڈ اور 2 اعشاریہ 0 جی پی اے، 40 سے 50 فیصد نمبروں تک ای گریڈ اور 1 اعشاریہ 0 جی پی اے جبکہ 40 فیصد سے کم نمبر لینے والے امیدواروں کو کوئی گریڈ نہیں دیا جائے گا۔
میٹرک اور انٹر کے سالانہ امتحان 2024ء کے نویں جماعت اور انٹر پارٹ فرسٹ (گیارویں جماعت) کے امتحانات کے رزلٹ کارڈ اور سند پر امیدواروں کے نمبروں ساتھ مذکورہ بالا نیو گریڈ فارمولے کے تحت ہر مضمون کا گریڈ اور جی پی اے بھی درج کی جائے گی۔
