جہلم: ایڈیشنل ڈپٹی کمشنر جنرل صباء سحر کی سربراہی میں ستھرا پنجاب مہم کے حوالے سے اہم اجلاس منعقد ہوا، جس میں ضلع بھر میں صفائی ستھرائی کو بہتر بنانے کے لیے اقدامات کا جائزہ لیا گیا۔
اجلاس میں اینٹی وال چاکنگ، تجاوزات کے خاتمے، سٹریٹ لائٹس کی مرمت، مین ہولز کی بندش جیسے مسائل پر بھی تفصیلی بات چیت ہوئی۔ متعلقہ محکموں کو ان مسائل کے حل کے لیے فوری اقدامات کرنے کی ہدایت دی گئی۔
اجلاس سے خطاب کرتے ہوئے صباء سحر نے کہا کہ پنجاب حکومت کا مقصد شہریوں کو صاف اور صحت مند ماحول فراہم کرنا ہے۔ اس مقصد کے تحت صفائی کے نظام کو جدید مشینری کی مدد سے مزید مؤثر بنایا جائے گا۔ ستھرا پنجاب مہم کے تحت شہر بھر میں صفائی کی سرگرمیاں بڑے پیمانے پر جاری ہیں، جس میں کچرے کے ڈھیروں، نالوں اور دیگر آلودگیوں کو صاف کرنے کے لیے دن رات کام ہو رہا ہے۔
صباء سحر نے بتایا کہ راولپنڈی ویسٹ مینجمنٹ کمپنی کی جانب سے صفائی کے عمل کو مزید بہتر بنایا جا رہا ہے۔ 15 جنوری سے ہر گلی اور محلے سے کچرا اٹھانے اور برسوں پرانے کچرے کے ڈھیروں کو ختم کرنے کا عمل شروع کر دیا جائے گا۔
انہوں نے کہا کہ کمپنی کا دفتر میونسپل کمیٹی میں قائم کیا جا رہا ہے تاکہ صفائی کی مشینری اور انتظامات کو بہتر طریقے سے کنٹرول کیا جا سکے۔ مزید مشینری بھی جلد جہلم پہنچنے والی ہے، جس سے ضلع بھر میں صفائی کے معیار کو مزید بلند کرنے میں مدد ملے گی۔
صباء سحر نے اجلاس میں کہا کہ ستھرا پنجاب مہم کا مقصد نہ صرف شہر کی صفائی کو یقینی بنانا ہے بلکہ عوام کو بہتر اور خوشگوار ماحول فراہم کرنا بھی ہے۔ اس مہم کے ذریعے شہریوں کو صاف اور صحت مند زندگی گزارنے کے مواقع فراہم کیے جائیں گے۔
