جہلم: پنجاب اسکول ایجوکیشن ڈیپارٹمنٹ نے بین الاقوامی صورتحال اور ممکنہ معاشی اثرات کے پیش نظر صوبہ بھر کے تمام سرکاری اور نجی تعلیمی اداروں کو عارضی طور پر بند رکھنے کا نوٹیفکیشن جاری کر دیا ہے۔
جاری کردہ نوٹیفکیشن کے مطابق پنجاب بھر کے تمام سرکاری اور نجی اسکول 10 مارچ 2026 سے 31 مارچ 2026 تک بند رہیں گے۔ تاہم پہلے سے طے شدہ امتحانات اور اسیسمنٹس اپنے مقررہ شیڈول کے مطابق ہی منعقد ہوں گے جبکہ تعلیمی سرگرمیوں کے تسلسل کے لیے جہاں ممکن ہو آن لائن تدریسی نظام بھی جاری رکھا جا سکتا ہے۔
حکومت پنجاب کی جانب سے تعلیمی اداروں کے حوالے سے فیصلہ کیا گیا ہے کہ پنجاب بھر میں اسکول، کالج اور یونیورسٹیاں 10 مارچ سے 31 مارچ تک بند رہیں گی۔ تاہم امتحانات اپنے مقررہ شیڈول کے مطابق ہوں گے جبکہ تعلیمی اداروں کو آن لائن کلاسز کے انعقاد کی اجازت ہوگی۔
حکومتی ذرائع کے مطابق یہ فیصلہ ایندھن کی بچت اور ممکنہ معاشی دباؤ کے پیش نظر کیا گیا ہے۔ بین الاقوامی سطح پر جاری کشیدگی اور جنگی صورتحال کے باعث تیل کی فراہمی اور توانائی کے ذخائر پر اثرات کا خدشہ ظاہر کیا جا رہا ہے، جس کے باعث حکومت نے ایمرجنسی اقدامات کے تحت تعلیمی اداروں کی عارضی بندش کا فیصلہ کیا۔
رپورٹس کے مطابق پاکستان میں ایندھن کے ذخائر میں کمی کے خدشات اور عالمی مارکیٹ میں تیل کی قیمتوں میں اضافے کے باعث حکومت توانائی کے استعمال کو کم کرنے کے لیے مختلف اقدامات کر رہی ہے۔
اسکول ایجوکیشن ڈیپارٹمنٹ نے تمام چیف ایگزیکٹو آفیسرز (ڈی ای اے) کو ہدایت جاری کی ہے کہ وہ اس فیصلے پر سختی سے عملدرآمد یقینی بنائیں تاکہ ایندھن کے استعمال میں کمی لائی جا سکے اور تعلیمی سرگرمیوں کا متبادل نظام بھی برقرار رکھا جا سکے۔
