جہلم کے پرائیویٹ اسپتال میں نوجوان امتیاز احمد کی ہلاکت کے معاملے پر محکمہ صحت نے انکوائری کمیٹی تشکیل دے دی۔
تفصیلات کے مطابق جہلم کے پرائیویٹ اسپتال میں نوجوان امتیاز احمد کی ہلاکت کے معاملے پر محکمہ صحت و پاپولیشن ویلفیئر جہلم نے حقائق جاننے کے لیے باقاعدہ انکوائری کمیٹی تشکیل دے دی ہے۔
محکمہ صحت جہلم کی جانب سے جاری کردہ تحریری حکم نامے کے مطابق انکوائری کمیٹی کو واقعے کے تمام پہلوؤں کی مکمل چھان بین کرکے 3 ورکنگ ڈیز کے اندر اپنی رپورٹ پیش کرنے کی ہدایت کی گئی ہے، تاکہ انکوائری رپورٹ کی روشنی میں مزید ضروری کارروائی عمل میں لائی جا سکے۔
حکم نامے کے مطابق ڈاکٹر احمد رضا نعمانی، سرجن ڈی ایچ کیو ہسپتال جہلم کو انکوائری کمیٹی کا کنوینر مقرر کیا گیا ہے جبکہ ڈاکٹر مسعود احمد، ڈی ڈی ایچ او جہلم اور ڈاکٹر محمد نسیم جاوید، اینستھیٹسٹ ٹی ایچ کیو ہسپتال سوہاوہ بطور ممبران کمیٹی میں شامل ہیں۔
محکمہ صحت کے حکم نامے میں واضح کیا گیا ہے کہ انکوائری صحافی عامر کیانی کی جانب سے امتیاز احمد کی میڈیکوز ہسپتال میں ہونے والی ہلاکت کے حوالے سے جاری پریس ریلیز کے تناظر میں تشکیل دی گئی ہے۔
محکمہ صحت نے انکوائری کمیٹی کو ہدایت کی ہے کہ واقعے سے متعلق تمام پہلوؤں، دستیاب ریکارڈ اور متعلقہ امور کا جائزہ لیتے ہوئے مقررہ مدت کے اندر اپنی رپورٹ پیش کی جائے، تاکہ حقائق سامنے آنے کے بعد مزید کارروائی کا فیصلہ کیا جا سکے۔
