کھیوڑہ: ڈپٹی کمشنرجہلم اور ڈی پی او جہلم کھیوڑہ میں عوامی مسائل کے حل کے لیے کھلی کچہری لگائیں تاکہ شہری ڈپٹی کمشنر اور ڈی پی او کو اپنے مسائل سے پوری طرح آگاہ کر سکیں۔
ان خیالات کا اظہار کھیوڑہ شہر کے عوامی سماجی حلقوں نے شہریوں کے مسائل دیکھتے ہوئے کیا۔ انہوں نے کہا کہ شہریوں کوسرکاری دفاتروں میں مسائل کے حل کے لیے جانے میں دشواری کا سامنا کرنا پڑتا ہے اور شہریوں کی سرکاری دفاتروں میں کوئی شنوائی نہیں ہوتی جس سے شہریوں کو سخت پریشانی کا سامنا کرنا پڑتا ہے۔
انہوں نے کہا کہ ڈپٹی کمشنرجہلم کیپٹن (ر) سمیع اللہ فاروق اور ڈی پی او جہلم ناصر محمود باجوہ کے آفس پہنچنے کیلئے شہریوں کو روڈ کی وجہ سے سفری مشکلات اور مہنگائی کے اس دور میں اتنے بھاری کرایوں کی وجہ سے شدید پریشانی کا سامنا کرنا پڑتا ہے۔
عوامی سماجی حلقوں نے ڈپٹی کمشنرجہلم سمیع اللہ فاروق اور ڈی پی او جہلم ناصر محمود باجوہ سے بھرپور مطالبہ کیا ہے کہ کھیوڑہ میونسپل کمیٹی کے آفس میں کھلی کچہری لگا کر عوامی مسائل سنیں اور موقع پر ہی متعلقہ محکموں کے افسران کو شہریوں کے مسائل فوری حل کرنے کے احکامات جاری کریں تاکہ شہریوں کی پریشانیوں سے نجات مل سکے۔
