پنڈدادنخان: فلاحی خدمات کے جذبے کے تحت اخوت فاؤنڈیشن کی دھریالہ جالپ برانچ نے پنڈدادنخان کے مختلف مراکز میں مستحق افراد کے لیے کھانے کا وسیع انتظام کیا۔ اس سلسلے میں پانچ مختلف مقامات پر 50 سے زائد دیگیں تیار کر کے درجنوں خاندانوں میں کھانا تقسیم کیا گیا۔
اس فلاحی سرگرمی میں ایریا منیجر محمد اشرف، برانچ منیجر دھریالہ جالپ دلاور حسین اور کھیوڑہ برانچ سے فخر زوہیب پیش پیش رہے۔ ان کا کہنا تھا کہ ملک کے موجودہ معاشی حالات اور عوام کو درپیش مشکلات کے پیش نظر اخوت کا مشن صرف مالی امداد تک محدود نہیں، بلکہ ہم ہر ممکن کوشش کر رہے ہیں کہ مستحق افراد کو کھانے اور راشن کی فراہمی یقینی بنائی جائے۔
انہوں نے بتایا کہ صرف گزشتہ دو ہفتوں کے دوران اخوت کے رضاکاروں نے 500 سے زائد خاندانوں کو گھروں تک راشن پہنچایا ہے۔ ان کا کہنا تھا کہ خدمت خلق کو ہم عبادت کا درجہ دیتے ہیں، اور ایسے حالات میں جبکہ ملک ایک آزمائش سے گزر رہا ہے، ہر فرد کا فرض بنتا ہے کہ وہ اپنے وسائل کے مطابق ضرورتمندوں کا ساتھ دے۔
انہوں نے مزید کہا کہ ہم بطور قوم اگر یکجہتی، احساس اور بھائی چارے کا مظاہرہ کریں تو انشاءاللہ یہ مشکل وقت بھی جلد گزر جائے گا۔ ان کی جانب سے دعا کی گئی کہ اللہ تعالیٰ پاکستان سمیت پوری دنیا کو اس موذی وبا اور مشکلات سے محفوظ رکھے اور ہمیں جلد اس آزمائش سے نجات دے۔
