جہلم: معرکہ حق اور آپریشن بنیان المرصوص کی کامیابی کو ایک سال مکمل ہونے کے موقع پر اکرم شہید پارک جہلم میں ضلعی انتظامیہ کے زیر اہتمام ایک شاندار اور پروقار تقریب کا انعقاد کیا گیا، جس میں مختلف سرکاری اداروں، سماجی شخصیات، طلبہ، شہریوں اور شہداء کی فیملیز نے بڑی تعداد میں شرکت کی۔
تقریب کے مہمانِ خصوصی وزیر مملکت بلال اظہر کیانی اور ایم این اے چوہدری فرخ الطاف تھے جبکہ ڈپٹی کمشنر جہلم میر رضا اوزگن سمیت دیگر اعلیٰ حکام بھی موجود تھے۔
تقریب سے خطاب کرتے ہوئے وزیر مملکت بلال اظہر کیانی نے کہا کہ افواجِ پاکستان کی قربانیاں پوری قوم کا فخر ہیں اور پاکستانی قوم اپنی بہادر افواج کے ساتھ سیسہ پلائی دیوار کی طرح کھڑی ہے۔ انہوں نے کہا کہ وطن عزیز کے دفاع کے لیے پاک فوج نے بے مثال قربانیاں دی ہیں جنہیں ہمیشہ یاد رکھا جائے گا۔
ایم این اے چوہدری فرخ الطاف نے خطاب کرتے ہوئے کہا کہ شہداء کی قربانیاں کبھی فراموش نہیں کی جائیں گی اور قومی اتحاد ہی پاکستان کی اصل طاقت ہے۔ انہوں نے کہا کہ معرکۂ حق قومی تاریخ کا سنہری باب بن چکا ہے اور وطن کے دفاع پر کسی قسم کا سمجھوتہ نہیں کیا جائے گا۔
ڈپٹی کمشنر جہلم میر رضا اوزگن نے کہا کہ افواجِ پاکستان نے وطن کے دفاع میں عظیم کردار ادا کیا اور دشمن کے ناپاک عزائم کو ناکام بنایا۔ انہوں نے کہا کہ پوری قوم اپنی افواج کے ساتھ مکمل یکجہتی رکھتی ہے اور ملکی سلامتی کے لیے ہر قربانی دینے کو تیار ہے۔
تقریب کے دوران ملی نغموں، خوبصورت ٹیبلوز اور قومی جذبے سے بھرپور پرفارمنسز نے شرکاء کا جوش و خروش بڑھا دیا جبکہ “پاکستان زندہ باد” کے نعروں سے فضا گونج اٹھی۔
اس موقع پر شہداء کی فیملیز کو خصوصی طور پر خراجِ عقیدت پیش کیا گیا، جبکہ آرٹس سیکشن اور فوڈ اسٹالز بھی شرکاء کی توجہ کا مرکز بنے رہے۔
تقریب کا اختتام شاندار آتش بازی کے ساتھ ہوا، جس نے شرکاء کے جذبہ حب الوطنی کو مزید جلا بخش دی۔
