جہلم: محکمہ صحت نے جلد کے لئے نقصان دہ بیوٹی کریموں اور کاسمیٹکس کے خلاف کریک ڈاؤن کرنے کا حتمی فیصلہ کر لیا، بیوٹی انجیکشن لگانے یا کسی قسم کی سرجری کرنے والے نان کوالیفائیڈ افراد کے خلاف بھی آپریشن کئے جائیں گے ۔ اس مقصد کے لئے ہیلتھ کیئر کمیشن اور ڈرگ کنٹرول ڈائریکٹوریٹ کی مشترکہ ٹیمیں تشکیل دی جا رہی ہیں۔
گزشتہ روز محکمہ صحت کے ذرائع سے معلوم ہوا ہے کہ رنگ گورا کرنے والی غیر معیاری کریمیں خوبصورتی کے نام پر جلدی بیماریاں پھیلا رہی ہیں۔ غیر معیاری بیوٹی کریموں کے استعمال سے سینکڑوں خواتین و افراد کی جلد کو شدید نقصان پہنچ رہا ہے۔
انہوں نے بتایا کہ بعض کا سمیٹکس میں سیسہ، زہر اور دیگر مضر صحت کیمیکلز کی مقدار خطرناک حد تک پائی گئی ہے جو جگر اور گردے کے کینسر جیسے مہلک امراض کا باعث بن رہی ہے۔
انہوں نے بتایا کہ بازاروں سے 24 مشہور برانڈز کی بیوٹی کریمیں لے کر ان کا ڈرگ ٹیسٹنگ لیبارٹری میں تجزیہ کروایا جا رہا ہے، جن میں مضر صحت کیمیکلز پائے جانے کی صورت میں ان کے خلاف سخت کارروائیاں کی جائیں گی۔
ذرائع کے مطابق ڈرگ کنٹرول کا عملہ بیوٹی کریموں اور کاسمیٹکس کے رجسٹرڈ ہونے یا نہ ہونے کا تعین کرے گا جبکہ حفظانِ صحت کے اصولوں پر عملدرآمد یقینی بنانے کے لئے بیوٹی پارلرز کی بھی سکریننگ کی جائے گی۔
جہلم سمیت ملک بھر میں نقصان دہ اور خطر ناک کا سمیٹکس کے استعمال میں بے پناہ اضافہ ہو چکا ہے۔ جلد کے لئے نقصان دہ بیوٹی کریموں اور کا سمیٹکس کے خلاف زیرو ٹالرنس سے کام لیا جائے گا۔ ہیپا ٹائٹس کنٹرول کے حوالے سے بھی بیوٹی پارلرز کا سروے کروایاجا رہا ہے ۔ہیپا ٹائٹس کنٹرول کے لئے پنجاب میں 70 ہزار بار برشاپس کا سروے کیا جا چکا ہے۔
