پنڈدادنخان: جہلم کے تاریخی و روحانی مقام دربار عالیہ جلالپور شریف میں عرس محبوبین اور بڑی گیارہویں شریف کی بابرکت تقریبات عقیدت و احترام کے ساتھ منعقد کی گئیں۔
تقریب کی صدارت سجادہ نشین آستانہ عالیہ چشتیہ حیدریہ جلالپور شریف سید انیس حیدر شاہ نے کی۔ عرس محبوبین کی روحانی تقریبات کا آغاز تلاوتِ قرآن پاک سے کیا گیا، جس کے بعد ملک کے معروف نعت خواں حضرات نے بارگاہِ رسالت مآب ﷺ میں عقیدت کے گلدستے پیش کیے۔
تقریب میں ملک بھر سے آئے ہوئے علمائے کرام، مشائخ عظام اور زائرین کی بڑی تعداد نے شرکت کی۔ اس موقع پر ڈی ایس پی پنڈدادنخان ملک محمد اکرم نے خصوصی خطاب کرتے ہوئے نبی کریم ﷺ کی سیرتِ طیبہ اور تعلیماتِ مبارکہ پر روشنی ڈالی اور حاضرین کو ان پر عمل کرنے کی تلقین کی۔
عرس کی تقریبات میں محفلِ سماع کا بھی اہتمام کیا گیا جس میں معروف قوال حضرات نے صوفیانہ کلام پیش کر کے محفل کو روحانیت سے بھر دیا۔ اختتامی نشست میں ختمِ شریف کے بعد دعائے خیر کی گئی۔ اس موقع پر ملک و ملت کی سلامتی، استحکامِ پاکستان اور فلسطینی مسلمانوں کے لیے خصوصی دعائیں مانگی گئیں۔
عرس محبوبین بڑی گیارہویں شریف کی اس بابرکت تقریب میں سینکڑوں مریدین، زائرین اور عقیدت مندوں نے شرکت کی، جو روحانی کیف و سرور کے ساتھ اپنے گھروں کو لوٹے۔
