ڈیول کیرج وے منصوبہ؛ فنڈز کی عدم فراہمی او ر تعمیر میں تاخیر، پنڈدادنخان میں مکمل ہڑتال اور احتجاج

پنڈدادنخان: لِلہ تا جہلم ڈیول کیرج وے منصوبہ کیلئے فنڈز کی عدم فراہمی او ر تعمیر میں تاخیر کے باعث ورکنگ کمیٹی کی کال پر تحصیل پنڈدادنخان کے باسی سراپا احتجاج بن گئے۔ تحصیل بھر میں مکمل شٹرڈاؤن ہڑتال، کھیوڑہ، ٹوبھہ،پننوال، دھریالہ جالپ اور جلالپور شریف میں احتجاجی دھرنے، لِلہ موڑ پر مرکزی دھرنا صحافیوں، وکلا، تاجر برداری اور سول سوسائٹی سمیت سینکڑوں افراد نے شرکت کی، معروف عالم دین مفتی محمد بشیر کرم نے مرکزی دھرنے کی قیادت کی۔

تفصیلات کے مطابق لِلہ انٹرچینج تا جہلم ڈیول کیرج وے منصوبے کیلئے فنڈز کی عدم فراہمی اور تعمیر میں تاخیر کے خلاف ورکنگ کمیٹی لِلہ جہلم روڈ کی کال پر تحصیل پنڈدادنخان میں مکمل پہیہ جام شٹر ڈاؤن ہڑتال کا اعلان کیا گیا جس پر پنڈدادنخان،کھیوڑہ، ہرنپور،دھریالہ جالپ اور جلالپور شریف میں تمام تجارتی مراکز مکمل بند رہے جبکہ سارا دن تحصیل پنڈدادنخان کا تین اضلاع کو ملانے والی سڑکوں کا رابطہ منقطع رہا۔

سینکڑوں مظاہرین نے احتجاج کرتے رہے۔ للِہ تا جہلم ڈیول کیرج وے منصوبے کیلئے فنڈز کی عدم فراہمی کے باعث تعمیراتی کام بند ہیں جس سے تحصیل پنڈدادنخان کے لاکھوں افراد اذیت اور مشکلات کا شکار ہیں۔ معمولی بارش سے کئی کئی گھنٹے ٹریفک بلاک ہو جاتی ہے، تین سال سے گردوغبار سے روڈ کے ساتھ بسنے والی عوام کو غیر معمولی مشکلات کا سامنا کرنا پڑرہا ہے۔

احتجاج میں شرکاء نے حکومت وقت سے مطالبہ کیا کہ للِہ تا جہلم روڈ کے لیے فوری فنڈ جاری کرتے ہوئے سڑک کی تعمیر کا کام شروع کروایا جائے تاکہ لاکھوں افراد ذہنی اذیت سے بچ سکیں۔

شرکاء سے مفتی محمد بشیر کرم نے خطاب کرتے ہوئے کہا کہ بنیادی سہولیات تحصیل پنڈدادنخان کے عوام کا حق ہے۔ لِلہ تا جہلم روڈ کا منصوبہ التوا کا شکار ہونے کے باعث عوام سمیت ہر طبقہ سے تعلق رکھنے والے افراد کا نقصان ہو رہا ہے جبکہ نماز جمعہ بھی مفتی کرم بشیر کی قیادت میں لِلہ چوک میں ادا کی گئی۔

للِہ تا جہلم ڈ یول کیرج وے منصوبہ فنڈز کی عدم فراہمی کے باعث تعمیراتی کام بند ہے جس سے تحصیل پنڈدادنخان کے لاکھوں افراد اذیت اور مشکلات کا شکار ہیں، ورکنگ کمیٹی کی کال پر کیا گیا احتجاج شام کے وقت باہمی مشاورت سے موخر ہوا۔ اہل علاقہ نے مطالبہ کیا ہے کہ جلد فنڈز جاری کر کے روڈ پر فی الفور کام شروع کرایا جائے۔

یہ بھی پڑھنا مت بھولیں

ایک تبصرہ

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button