پنڈدادنخان میں جرائم پیشہ عناصر کے نرغے میں عوام عدم تحفظ کا شکار ہو گئے ہیں۔ ایک ہفتے کے دوران چوری اور ڈکیتی کی متعدد وارداتوں میں شہری لاکھوں روپے نقدی، قیمتی موبائلز اور سامان سے محروم ہو گئے۔
تفصیلات کے مطابق جہلم کی تحصیل پنڈدادنخان کی ڈھوک وینس کے قریب ایک مسلح ڈکیتی کی واردات میں پنڈدادنخان کے رہائشی قصاب جو مویشی منڈی مال خریدنے جا رہے تھے نامعلوم موٹر سائیکل سوار مسلح ڈاکوؤں کے ہاتھوں لوٹ لیے گئے۔
واردات کے دوران پولیس اور ڈاکوؤں کے درمیان فائرنگ کا تبادلہ ہوا، لیکن پولیس کے پاس موجود ناکارہ اور پرانا اسلحہ ہونے کی وجہ سے گولیاں نہ چل سکیں اور ڈاکو فائرنگ کرتے ہوئے بآسانی فرار ہو گئے۔
اسی طرح آدووال کے قریب مسافروں سے بھری ایک بس کو لوٹ لیا گیا۔ نامعلوم ڈاکوؤں نے اسلحہ کی نوک پر مسافروں سے نقدی اور قیمتی سامان چھین لیا اور موقع سے فرار ہو گئے۔
تحصیل پنڈدادنخان میں جرائم کی بڑھتی ہوئی وارداتوں نے عوام میں خوف و ہراس پھیلا دیا ہے۔ شہریوں نے شکایت کی ہے کہ پولیس جرائم کی روک تھام میں ناکام ہو رہی ہے، اور ہر گزرتے دن کے ساتھ وارداتوں کی تعداد بڑھتی جا رہی ہے۔
عوام نے آر پی او راولپنڈی اور ڈی پی او جہلم سے اپیل کی ہے کہ فوری طور پر جرائم پیشہ عناصر کے خلاف سخت کارروائی کی جائے اور پولیس کو جدید اسلحہ اور تربیت فراہم کی جائے تاکہ شہریوں کی جان و مال محفوظ بنائی جا سکے۔
