مانچسٹر: گریٹر مانچسٹر چیمبر آف کامرس کی طرف سے سیالکوٹ چیمبر آف کامرس اینڈ انڈسٹری کے دس رکنی وفد کے اعزاز میں ایک نیٹ ورکنگ استقبالیہ کا اہتمام کیا گیا، جو پاکستان ہائی کمیشن کے زیر انتظام برطانیہ کا دورہ کر رہے ہیں۔
پاکستان کے لیے برطانیہ کے وزیر اعظم کے تجارتی ایلچی مسٹر جیمز ڈیلی ایم پی مہمان خصوصی تھے۔ دیگر معززین میں افضل خان ایم پی، راشد اقبال سی ای او پاکستان برطانیہ بزنس کونسل (پی بی بی سی)، مانچسٹر میں پاکستان کے قونصل جنرل محمد طارق وزیر اور پاکستان ہائی کمیشن لندن میں تعینات منسٹر ٹریڈ شفیق احمد شہزاد شامل تھے۔ دیگر کے علاوہ مانچسٹر میں مقیم تاجروں کی بڑی تعداد نے بھی تقریب میں شرکت کی۔
اس موقع پرمسٹر جیمز ڈیلی ایم پی نے کہا کہ سیالکوٹ نے اعلیٰ معیار کی مصنوعات تیار کی ہیں اور برطانیہ کی کھیلوں کی مارکیٹ مینوفیکچررز کے لیے بہت بڑی منڈی بننے کی صلاحیت رکھتی ہے۔
انہوں نے کہا کہ بطور تجارتی ایلچی وہ سیالکوٹ کو برطانیہ کے تجارتی نقشے پر نمایاں طور پر شامل کرنا چاہتے ہیں۔ برطانیہ سے شراکت داری کو مستحکم کرنے سے پاکستان کے ساتھ کاروبار کو مزید فروغ ملے گا۔ اسٹریٹجک طویل المدتی تجارتی شراکت داری بڑھانے کی ضرورت ہے جس کے لئے دونوں ممالک کے درمیان مضبوط تعلقات کی ضرورت ہوگی۔
افضل خان ایم پی نے ایس سی سی آئی کے وفد کا پرتپاک استقبال کیا۔ انہوں نے کہا کہ مانچسٹر میں مقیم پاکستانی سیالکوٹ شہر کے ساتھ تعلق کا ذریعہ بنیں گے۔ انہوں نے برطانیہ اور پاکستان کے درمیان ہنر مند افرادی قوت کے تبادلے کی ضرورت پر زور دیا۔
شفیق احمد شہزاد نے اپنے خطبہ استقبالیہ میں کہا کہ پاکستان اور برطانیہ کی دوطرفہ تجارت تقریباً 3 بلین امریکی ڈالر سالانہ ہے اور یہ بنیادی طور پر ٹیکسٹائل پر مبنی ہے۔ انہوں نے کہا کہ برطانیہ میں پاکستانی مصنوعات کے لیے بے پناہ مانگ موجود ہے۔ پاکستان ہائی کمیشن پاکستانی اور برطانوی تاجروں کے درمیان روابط بڑھانے کے لیے انتھک محنت کر رہا ہے۔
ایس سی سی آئی کے وفد کی قیادت کرتے ہوئے اکرام الحق نے کہا کہ سیالکوٹ کی صنعتیں دنیا بھر میں 100 سے زائد عالمی معیار کے برانڈز کے لیے مواد فراہم کرتی ہیں۔ انہوں نے کہا کہ سیالکوٹ کی صنعت دنیا کی فٹ بال کی تیاری کا 70 فیصد حصہ پورا کرتا ہے اور سالانہ اربوں مالیت کی مصنوعات برآمد کرتا ہے۔
انہوں نے مانچسٹر میں ان کی میزبانی کرنے پر گریٹر مانچسٹر چیمبر آف کامرس اور برطانیہ میں مقیم تاجروں کے ساتھ نیٹ ورکنگ کی سہولت فراہم کرنے پر پاکستان ہائی کمیشن کا شکریہ ادا کیا۔
بعد ازاں، ایک نیٹ ورکنگ سیشن کا انعقاد کیا گیا جس میں برطانیہ میں مقیم تاجروں نے ایس سی سی آئی کی تیار کردہ مصنوعات بشمول چمڑے کے سامان، آلات جراحی، کھیلوں کے لباس، فٹ بال اور کرکٹ کے بلے اور گیندوں میں گہری دلچسپی کا اظہار کیا۔
