سوہاوہ: پنجاب بھر کی طرح سوہاوہ کے نواحی علاقہ ڈومیلی کی پانچوں یونین کونسلز میں بھی وزیر اعلیٰ پنجاب مریم نواز شریف کی ہدایات پر مستحق خاندانوں میں نگہبان رمضان کارڈ کی تقسیم کا سلسلہ تیزی سے جاری ہے۔
یونین کونسل نگیال میں سیکرٹری یونین کونسل محمد ندیم کی نگرانی میں PSER ٹیم نے حلقہ پٹواری چوہدری فرخ اور سماجی شخصیت چوہدری قیصر رانجھا کے ہمراہ گھر گھر جا کر مستحق افراد میں نگہبان رمضان کارڈ تقسیم کیے۔ اس موقع پر شفافیت اور نظم و ضبط کے ساتھ کارڈز کی فراہمی کو یقینی بنایا گیا تاکہ کوئی حقدار اس سہولت سے محروم نہ رہ جائے۔
سماجی شخصیت چوہدری قیصر رانجھا نے اس موقع پر گفتگو کرتے ہوئے کہا کہ وزیر اعلیٰ پنجاب مریم نواز کا غریب عوام کے لیے رمضان المبارک میں فی خاندان دس ہزار روپے کا منصوبہ ایک بہترین اور قابلِ تحسین اقدام ہے، جس سے مستحق خاندان رمضان میں اپنی بنیادی ضروریات باعزت طریقے سے پوری کر سکیں گے۔
نگہبان رمضان کارڈ کے اجرا پر اہلِ علاقہ نے خوشی کا اظہار کرتے ہوئے وزیر اعلیٰ پنجاب مریم نواز کا شکریہ ادا کیا اور کہا کہ یہ فلاحی منصوبہ مہنگائی کے اس دور میں غریب اور متوسط طبقے کے لیے حقیقی ریلیف ثابت ہو رہا ہے۔
عوامی حلقوں نے امید ظاہر کی کہ حکومت پنجاب مستقبل میں بھی اسی طرح کے عوام دوست اقدامات جاری رکھے گی۔
