جہلم: ڈی پی او جہلم طارق عزیز سندھو کی زیرِ صدارت ڈی پی او آفس میں محکمہ جنگلات کے سینئر افسران کے ساتھ غیر قانونی شکار کی روک تھام کے حوالے سے ایک اہم میٹنگ منعقد ہوئی۔
اجلاس میں ضلع جہلم کے مختلف علاقوں میں غیر قانونی شکار کے بڑھتے ہوئے واقعات، اس کے اسباب، اور ان کے تدارک کے لیے جامع حکمت عملی پر تفصیلی غور کیا گیا۔
ڈی پی او جہلم نے اجلاس میں ہدایت کی کہ غیر قانونی شکار میں ملوث افراد کے خلاف بلا امتیاز سخت قانونی کارروائی عمل میں لائی جائے۔ انہوں نے پولیس اور محکمہ جنگلات کے درمیان قریبی رابطہ قائم رکھنے کی ضرورت پر زور دیتے ہوئے کہا کہ مشترکہ ناکہ بندیوں، سرچ آپریشنز اور گشت کو مزید مؤثر بنایا جائے تاکہ شکار کی روک تھام کو یقینی بنایا جا سکے۔
ڈی پی او نے یہ بھی کہا کہ حساس اور نشاندہی شدہ علاقوں میں خصوصی ٹیمیں تعینات کی جائیں تاکہ غیر قانونی شکار کی بروقت روک تھام ممکن ہو سکے۔ انہوں نے ہدایت کی کہ غیر قانونی شکار کی اطلاع ملتے ہی فوری رسپانس یقینی بنایا جائے اور ملزمان کے خلاف متعلقہ قوانین کے تحت مقدمات درج کیے جائیں۔
انہوں نے مزید کہا کہ جنگلی حیات کا تحفظ ہم سب کی مشترکہ ذمہ داری ہے اور قدرتی ماحول کے تحفظ کے لیے کسی بھی قسم کی غفلت برداشت نہیں کی جائے گی۔ ڈی پی او جہلم نے واضح کیا کہ غیر قانونی شکار میں ملوث عناصر کے خلاف سخت کارروائیاں جاری رہیں گی اور قانون کی عملداری کو ہر صورت یقینی بنایا جائے گا۔
ڈسٹرکٹ پولیس آفیسر جہلم طارق عزیز سندھو نے شہریوں سے بھی اپیل کی کہ وہ غیر قانونی شکار کی کسی بھی اطلاع فوری پولیس یا محکمہ جنگلات کو فراہم کریں تاکہ بروقت کارروائی کی جا سکے۔
