سوہاوہ/ ڈومیلی: بڑاگواہ کے رہائشی معروف سماجی شخصیت چوہدری لطیف عرف ٹیپو کی جانب سے حسب روایت اس سال بھی 750 مستحق خاندانوں میں رمضان راشن تقسیم کیا گیا۔ وہ ہر سال اپنے مرحوم والدین اور مرحوم بھائی حنیف کوثر کے ایصال ثواب کے لیے یہ سلسلہ جاری رکھتے ہیں تاکہ ماہِ رمضان میں ضرورت مند خاندانوں کو ریلیف فراہم کیا جا سکے۔
رمضان المبارک کی آمد سے ایک ماہ قبل چوہدری لطیف عرف ٹیپو اور ان کی ٹیم کی جانب سے مستحق افراد کی رجسٹریشن کا عمل شروع کیا جاتا ہے، جس میں غریب، یتیم اور بیوہ خواتین کے شناختی کارڈ جمع کرکے باقاعدہ فارم پُر کیے جاتے ہیں۔ مستحقین کی فہرست مکمل ہونے کے بعد تمام رجسٹرڈ خاندانوں کو راشن فراہم کیا جاتا ہے جبکہ کسی بھی ضرورت مند کو خالی ہاتھ واپس نہیں بھیجا جاتا اور ہر ممکن مدد فراہم کی جاتی ہے۔
اس موقع پر 750 مستحق خاندانوں میں تقسیم کیے گئے راشن پیکج میں 20 کلو آٹا، 5 لیٹر کوکنگ آئل، 5 کلو چینی، 2 کلو چنے، 2 کلو کھجوریں، نمک، سویاں، پتی، مرچ، روح افزاء شربت اور بیسن شامل تھا۔ اس کے علاوہ راشن وصول کرنے والے خاندانوں کو کرایہ بھی فراہم کیا گیا تاکہ انہیں کسی قسم کی سفری پریشانی کا سامنا نہ کرنا پڑے۔
راشن تقسیم کے موقع پر مستحقین نے چوہدری لطیف عرف ٹیپو اور ان کے بھائیوں کا تہہ دل سے شکریہ ادا کیا اور ان کے مرحوم والدین اور بھائی کی مغفرت کے لیے دعا کی۔ اس فلاحی کام کو علاقے میں نیکی اور خدمت خلق کی ایک مثال قرار دیا جا رہا ہے، جس سے سینکڑوں ضرورت مند خاندانوں کو ماہِ رمضان میں ریلیف مل رہا ہے۔
چوہدری لطیف عرف ٹیپو نے اس موقع پر کہا کہ وہ اللہ کی رضا اور نیکی کی نیت سے یہ سلسلہ ہر سال جاری رکھتے ہیں تاکہ کوئی بھی غریب یا ضرورت مند رمضان المبارک میں بنیادی ضروریات سے محروم نہ رہے۔ انہوں نے مزید کہا کہ ان کی ہمیشہ کوشش رہی ہے کہ علاقے میں فلاح و بہبود کے کام جاری رکھے جائیں، تاکہ زیادہ سے زیادہ مستحق افراد کو فائدہ پہنچ سکے۔
