جہلم میں گھریلو ناچاقی پر خاوند نے بچوں کے سامنے مبینہ طور پر فائرنگ کر کے بیوی کو قتل کر دیا، پولیس نے خاوند کو حراست میں لے لیا۔
تفصیلات کے مطابق جہلم کے علاقہ لنگر پور میں گھریلو ناچاقی پر بابر نامی شخص نے مبینہ طور پر فائرنگ کر کے اپنی بیوی کو قتل کر دیا۔ پولیس نے خاتون کی لاش کو تحویل میں لے کر پوسٹمارٹم کے لئے اسپتال منتقل کردیا۔
تھانہ کالا گجراں پولیس نے ملزم بابر کو موقع سے حراست میں لے کر تھانے منتقل کردیا۔
پولیس کا کہنا ہے کہ ملزم سات ماہ پہلے دبئی سے کام چھوڑ کر پاکستان آیا اور بیروزگار تھا۔ کام نہ کرنے کی وجہ سے میاں بیوی کا گھر میں لڑائی جھگڑا ہوتا رہتا تھا۔
پولیس کا یہ بھی کہنا ہے کہ مقتولہ 3بچوں کی ماں تھی، قتل کی واردات کے وقت بچے بھی موجود تھے۔
تھانہ کالا گجراں پولیس نے مقتولہ کے والد کی مدعیت میں مقدمہ درج کر لیا۔
