جہلم پولیس نے ماہِ جنوری 2026 کی کارکردگی رپورٹ جاری کر دی ہے، جس کے مطابق ضلع بھر میں امن و امان کے قیام، جرائم کی روک تھام اور شہریوں کے جان و مال کے تحفظ کے لیے مؤثر اور بھرپور اقدامات کیے گئے۔ ماہ جنوری میں 14 گینگز کو ٹریس کر کے مجموعی طور پر 34 لاکھ 11 ہزار 500 روپے مالیت کا مالِ مسروقہ برآمد کیا گیا۔
تفصیلات کے مطابق جہلم پولیس نے ڈسٹرکٹ پولیس آفیسر جہلم طارق عزیز سندھو کی کمانڈ میں اغواء، قتل و اندھے قتل، چوری، ڈکیتی اور رابری جیسے سنگین جرائم کی ٹریسنگ، منشیات کے مکمل خاتمے اور جرائم پیشہ عناصر کی بیخ کنی کے لیے دن رات کام کیا۔ کمیونٹی پولیسنگ، بروقت انصاف کی فراہمی اور شہریوں کو تحفظ مہیا کرنے کے لیے جہلم پولیس ہمہ وقت متحرک رہی، جبکہ امن و امان برقرار رکھنے کے لیے مختلف علاقوں میں سرچ آپریشنز کا سلسلہ بھی جاری رکھا گیا۔
رپورٹ کے مطابق گزشتہ ماہ کے دوران 95 مجرمان اشتہاری گرفتار کیے گئے، جن میں 25 اے کیٹگری، 38 بی کیٹگری جبکہ 32 عدالتی مفروران شامل ہیں۔ قتل کے چار مقدمات درج کر کے تین ملزمان کو گرفتار کیا گیا جبکہ ریپ کے دو مقدمات درج کر کے دونوں ملزمان کو حراست میں لیا گیا۔ اسی طرح 14 گینگز کو ٹریس کر کے 62 مقدمات میں 38 ملزمان کو گرفتار کیا گیا اور ان کے قبضے سے 34 لاکھ 11 ہزار 500 روپے برآمد کیے گئے۔
منشیات کے خلاف کارروائیوں میں 10 مقدمات درج کیے گئے اور 13 ملزمان گرفتار کیے گئے، جن کے قبضے سے 3 کلو 120 گرام ہیروئن اور 160 بوتلیں شراب برآمد ہوئیں۔ غیر قانونی اسلحے کے خلاف 23 مقدمات درج کر کے 23 ملزمان کو گرفتار کیا گیا، جن سے 16 پسٹلز، 6 گنز، ایک کلاشنکوف اور 68 عدد روند برآمد کیے گئے۔
قمار بازی کے خلاف کارروائیوں میں 3 مقدمات درج کر کے 25 ملزمان کو گرفتار کیا گیا، جن سے 1 لاکھ 56 ہزار 540 روپے نقدی، 27 موبائل فونز، ایک موٹر سائیکل، ایک کار، ایک کیری ڈبہ، ایک ویگن، 6 مرغے اور 2 شکاری کتے برآمد کیے گئے۔
پتنگ بازی کے خلاف جاری کریک ڈاؤن کے دوران 53 مقدمات درج کر کے 55 ملزمان کو گرفتار کیا گیا، جن کے قبضے سے 2 ہزار 157 پتنگیں اور 114 خونی ڈوریں برآمد کی گئیں۔ بھکاریوں کے خلاف کریک ڈاؤن میں 67 مقدمات درج کر کے 70 ملزمان کو گرفتار کیا گیا، جن میں 31 مرد اور 39 خواتین شامل ہیں۔ ٹریفک قوانین کی خلاف ورزی پر 10 ہزار 481 چالان کیے گئے اور 2 کروڑ 42 لاکھ 88 ہزار روپے جرمانہ عائد کیا گیا۔
اسی دوران پولیس خدمت مراکز جہلم سے 5 ہزار 812 شہریوں نے مختلف سہولیات سے استفادہ کیا، جبکہ ڈسٹرکٹ پولیس آفیسر جہلم نے گزشتہ ماہ کمپلینٹ سیل کے ذریعے 215 سائلین کی شکایات سن کر ان پر موقع پر احکامات جاری کیے۔
ڈی پی او جہلم طارق عزیز سندھو کا کہنا ہے کہ شہریوں کے جان و مال کے تحفظ، جرائم کے خاتمے اور قانون کی بالادستی کے لیے جہلم پولیس کی کارروائیاں بلاامتیاز جاری رہیں گی اور عوام کے تعاون سے ضلع میں امن و امان کو مزید مضبوط بنایا جائے گا۔
