جہلم: حلقہ این اے 62 (گجرات 1) سے پی ٹی آئی کے حمایت یافتہ کامیاب امیدوار محمد الیاس چوہدری کو منگل کو جہلم سے مبینہ طور پر اغواء کر لیا گیا۔
چوہدری الیاس کو سرائے عالمگیر سے اسلام آباد جاتے ہوئے دریائے جہلم پل سے اغواء کیا گیا۔ چوہدری الیاس پی ٹی آئی کی حمایت سے آزاد امیدوار کی حیثیت سے رکن قومی اسمبلی منتخب ہوئے تھے۔
دوسری جانب پولیس نے چوہدری الیاس کی گرفتاری کے حوالے سے کسی قسم کے ملوث ہونے سے انکار کردیا۔
چوہدری الیاس کے کزن نے جہلم کے تھانہ سٹی میں ایف آئی آر درج کرائی ہے۔ فرسٹ انفارمیشن رپورٹ (ایف آئی آر) کے مطابق چوہدری الیاس کو اسلام آباد جاتے ہوئے اغواء کیا گیا۔
جہلم پولیس کا کہنا ہے کہ سرائے عالمگیر سے منتخب ایم این اے کے مبینہ اغواء کی تحقیقات شروع کر دی ہیں۔
یاد رہے کہ عام انتخابات میں حلقہ این اے 62 سے محمد الیاس چوہدری 97 ہزار 436 ووٹ لے کر کامیاب ہوئے جبکہ مسلم لیگ ن کے چوہدری عابد رضا 71 ہزار 154 ووٹ لے کر دوسرے نمبر پر رہے۔
