لندن میں سیاحت کے سب سے بڑے عالمی فیسٹیول ’’ورلڈ ٹورازم مارٹ‘‘ کا آغاز ہو گیا ۔
ورلڈ ٹورازم مارٹ (WTM) میں پاکستان پویلین کا افتتاح وزیر مملکت برائے سیاحت وصی شاہ نے برطانیہ میں پاکستان کے ہائی کمشنر ڈاکٹر محمد فیصل کے ہمراہ کیا۔
وصی شاہ کی قیادت میں پاکستان ٹورازم ڈویلپمنٹ کارپوریشن (PTDC)، صوبائی محکمہ سیاحت، آزاد جموں و کشمیر اور گلگت بلتستان دنیا کے سب سے بڑے ٹریول شو میں شرکت کر رہے ہیں۔
ٹریول مارٹ کے انتظامات کو سراہتے ہوئے وصی شاہ نے کہا کہ بین الاقوامی سطح پر پاکستان کے سیاحتی مقامات سے متعلق نمائش WTM جیسے شوز سے آنے والے دنوں میں مزید سیاحوں کو پاکستان کی طرف راغب کرنے میں مدد ملے گی۔ وفاقی وزیر نے کہا کہ پاکستان کو دنیا کے خوبصورت ترین مناظر اور ثقافتی تنوع سے نوازا گیا ہے جس سے پاکستان سیاحتی اعتبار سے بہترین ملک ہے۔
انہوں نے کہا کہ حکومت ملکی معیشت کو سہارا دینے کیلئے پاکستان میں سیاحتی سرگرمیوں کے فروغ پر یقین رکھتی ہے۔اگر انفراسٹرکچر کو بہتر بنایا جائے اور دنیا میں اختیار کی جانے والی نتیجہ خیز کامیاب حکمت عملی کو اپنایا جائے تو سیاحت پاکستان کیلئے زرمبادلہ کے حصول کا بہت بڑا ذریعہ ثابت ہو سکتی ہے۔
وزیرسیاحت نے اس سلسلے میں شرکاء سے تجاویز بھی حاصل کیں اور انہیں حکومت پاکستان کی طرف سے سیاحت کی صنعت میں آسانیاں پیدا کرنے کیلئے ہر ممکن تعاون کا یقین دلایا۔وزیر مملکت نے پاکستان ہائی کمیشن کا بھی شکریہ ادا کیا اور پاکستان ٹورزم ڈویلپمنٹ کو ورلڈ ٹورزم مارٹ میں لانے پر ہائی کمیشن کےکردار کو خصوصی طور پر سراہا۔
ورلڈ ٹریول مارٹ میں ملکی سیاحت کی بھرپور عکاسی کرتے ہوئے پاکستان پویلین نے بڑی تعداد میں سیاحوں، بین الاقوامی ٹریول کمپنیوں کے نمائندوں اور سوشل میڈیا پر اثرانداز ہونے والوں کی توجہ حاصل کی ۔ورلڈ ٹریول مارٹ میں پاکستان پویلین ان لوگوں کی توجہ کا مرکز بھی تھا جو اس سے قبل سیاحت کیلئے پاکستان آچکے ہیں اور پاکستان کے دیگر سیاحتی مقامات دیکھنے کیلئے دوبارہ پاکستان آنے میں دلچسپی رکھتے ہیں۔
ڈبلیو ٹی ایم لندن دنیا کے سب سے بڑے ٹریول شوز میں سے ایک ہے اور سیاحوں کو دنیا کے 5000سے زیادہ بڑے مقامات اور برانڈز سے متعارف کراتا ہے۔ لندن ایکسل میں شروع ہونے والا ورلڈ ٹریول مارٹ 6 نومبر سے 8 نومبر 2023 تک جاری رہے گا۔
