او آئی سی کی قائمہ کمیٹی برائے سائنسی اور تکنیکی تعاون نے موریطانیہ میں طلبا، اسکالرز اور اداروں کے لیے ریسرچ فیلو شپ کا اعلان کیا ہے تاکہ باہمی تعلقات کو مضبوط بنایا جا سکے اور موریطانیہ میں سائنسی صلاحیتوں کو بڑھایا جاسکے۔
سرکاری ذرائع کے مطابق ان تحقیقی فیلوشپس کا اعلان کامسٹیک اور نیشنل ایجنسی فار سائنٹیفک ریسرچ اینڈ انوویشن موریطانیہ نے سائنس اور ٹیکنالوجی صلاحیت سازی کے مشترکہ پروگرام کے تحت کیا ہے۔
کامسٹیک موریطانیہ کے ساتھ دیرینہ برادرانہ تعلقات رکھتا ہے اور یہ پروگرام دونوں ممالک کے درمیان سائنسی تعاون کو مزید مستحکم کرے گا۔ کامسٹیک موریطانیہ پروگرام کے تحت موریطانیہ میں نوجوان محققین اور ابتدائی مرحلے کے سائنس دانوں اور انجینئروں کو ریسرچ فیلوشپ فراہم کی جائیں گی تاکہ وہ او آئی سی کے رکن ممالک بالخصوص پاکستان کے متعدد فہرست شدہ اداروں کے متعلقہ سینٹر آف ایکسیلینس میں 6 ماہ گزار سکیں۔
ان فیلوشپس کا مقصد موریطانیہ سے تعلق رکھنے والے ہونہار محققین اور انجینئرز کی تحقیقی اور ترقیاتی صلاحیتوں میں اضافہ کرنا ہے تاکہ وہ اپنے شعبوں میں مزید تعاون کے لئے روابط کو فروغ دے سکیں۔
اس پروگرام کے علاوہ موریطانیہ کے طلبا اور اسکالرز کامسٹیک کے دیگر پروگراموں میں بھی حصہ لے سکتے ہیں جو کامسٹیک کی ویب سائٹ اور سوشل میڈیا کے ذریعے لانچ اور تشہیر کیے جاتے ہیں۔
اسی طرح موریطانیہ کے ریسرچ اینڈ ڈویلپمنٹ ادارے علم، مہارت، ٹیکنالوجی اور وسائل کے تبادلے کے لیے کامسٹیک سینٹر آف ایکسیلینس اداروں کے ساتھ تعاون کر سکتے ہیں تاکہ ان کی صلاحیتوں کو فروغ دیا جا سکے اور حل تلاش کیے جا سکیں۔
درخواست جمع کرانے کی آخری تاریخ 10 دسمبر ہو گی اور پروگرام کی تمام تفصیلات ویب لنک پر دستیاب ہیں.
