جہلم: میجر اکرم شہید روڈ، کچہری روڈ پر قائم نجی ہسپتالوں، میرج ہالز کی انتظامیہ نے سرکاری سڑک کو پارکنگ میں تبدیل کر دیا، میونسپل کمیٹی کے شعبہ انکروچمنٹ و ٹریفک پولیس کی خاموشی سوالیہ نشان بن گئی۔
تفصیلات کے مطابق میجر اکرم شہید روڈ، کچہری روڈپر قائم نجی ہسپتالوں اور میرج ہالز کی زاتی پارکنگ نہ ہونے کیوجہ سے صبح و شام آنے والے مریضوں اور ان کے لواحقین سرکاری سڑک پرا پنی موٹر سائیکلیں، گاڑیاں کھڑی کرکے سڑک بند کر دیتے ہیں، جس کی وجہ سے شہر آنے اور شہر سے باہر جانے والوں کو شدید مشکلات کا سامنا کرنا پڑتا ہے۔
نجی ہسپتالوں میں آنے والے مریض اور ان کے لواحقین سڑک کنارے گاڑیاں کھڑی کرکے غائب ہو جاتے ہیں ، جس کی وجہ سے مضافاتی علاقوں سے آنے والی چھوٹی، بڑی گاڑیاں موٹر سائیکل سواروں کو شدید پریشانی کا سامنا کرنا پڑتا ہے. میونسپل کمیٹی کے شعبہ انکروچمنٹ اور ٹریفک پولیس کے عملہ کی عدم دلچسپی کی وجہ سے شہریوں کو طویل دورانیے تک مسائل کاسامنا کرنا پڑتا ہے۔
شہریوں نے ڈپٹی کمشنر، ڈسٹرکٹ پولیس آفیسر، ڈی ایس پی ٹریفک پولیس اور ایڈمنسٹریٹر میونسپل کمیٹی سے مطالبہ کیاہے کہ میجر اکرم شہید روڈ، کچہری روڈ پر قائم ہونے والے نجی ہسپتالوں ، میرج ہالز کے باہر کھڑی ہونے والی گاڑیوں ، موٹر سائیکلز مالکان کے خلاف قانونی کارروائیاں عمل میں لائی جائیں تاکہ شہریوں کو آمدورفت میں پیش آنے والی پریشانیوں کا خاتمہ ممکن ہو سکے۔
