جہلم: معرکہ حق اور آپریشن بنیان مرصوص کی کامیابی کو ایک سال مکمل ہونے کے موقع پر ضلعی انتظامیہ جہلم کے زیر اہتمام مختلف تقریبات اور خصوصی سرگرمیوں کا انعقاد کیا گیا، جن کا مقصد افواجِ پاکستان کی قربانیوں، بہادری اور ملکی دفاع میں ان کے کردار کو خراجِ تحسین پیش کرنا تھا۔
اس موقع پر ضلعی انتظامیہ کی جانب سے شہریوں میں خصوصی پرنٹڈ شرٹس بھی تقسیم کی گئیں۔ اسسٹنٹ کمشنرز نے مختلف مقامات پر شہریوں میں یہ شرٹس تقسیم کیں جن پر معرکہ حق اور آپریشن بنیان مرصوص سے متعلق قومی جذبے، حب الوطنی اور افواجِ پاکستان کی خدمات کو اجاگر کرنے والے خصوصی پیغامات درج تھے۔
تقریبات میں شریک شہریوں نے اس اقدام کو قومی یکجہتی، حب الوطنی اور نوجوان نسل میں قومی شعور بیدار کرنے کے لیے ایک مثبت اور قابلِ تحسین قدم قرار دیا۔ مختلف علاقوں سے تعلق رکھنے والے افراد نے بھرپور شرکت کرتے ہوئے افواجِ پاکستان سے اظہارِ یکجہتی کیا اور ملکی سلامتی کے لیے اپنی نیک تمناؤں کا اظہار کیا۔
شرکاء کا کہنا تھا کہ افواجِ پاکستان نے ہمیشہ ملک کی سلامتی، خودمختاری اور استحکام کے لیے بے مثال قربانیاں دی ہیں جنہیں قوم کبھی فراموش نہیں کرے گی۔
تقریبات کے اختتام پر اس عزم کا اظہار کیا گیا کہ معرکہ حق اور آپریشن بنیان مرصوص کی کامیابیوں اور قربانیوں کو ہمیشہ یاد رکھا جائے گا جبکہ نئی نسل میں حب الوطنی، قومی یکجہتی اور دفاعِ وطن کے جذبے کو مزید فروغ دینے کے لیے ایسی سرگرمیاں مستقبل میں بھی جاری رکھی جائیں گی۔
