جہلم: نو تعینات اسسٹنٹ کمشنر جہلم عبداللہ غازی خان نے اپنے عہدے کا باقاعدہ چارج سنبھال کر ذمہ داریاں ادا کرنا شروع کر دی ہیں۔ عہدہ سنبھالنے کے بعد انہوں نے عوامی خدمت اور انتظامی امور کی بہتری کے عزم کا اظہار کیا۔
اس موقع پر اسسٹنٹ کمشنر عبداللہ غازی خان نے کہا کہ ضلعی انتظامیہ کی رہنمائی میں عوامی مسائل کو ترجیحی بنیادوں پر حل کرنا اور شہریوں کو بہتر انتظامی سہولیات کی فراہمی ان کی اولین ترجیحات میں شامل ہے۔
انہوں نے کہا کہ ڈپٹی کمشنر جہلم میر رضا اوزگن کی قیادت میں شہریوں کی فلاح و بہبود، صفائی ستھرائی کے نظام میں بہتری، تجاوزات کے خاتمے اور شہر کے بنیادی ڈھانچے کو جدید خطوط پر استوار کرنے کے لیے تمام دستیاب وسائل بروئے کار لائے جائیں گے۔
عبداللہ غازی خان نے اس عزم کا اعادہ کیا کہ تحصیل جہلم میں عوامی شکایات کے بروقت ازالے، سرکاری محکموں کی کارکردگی میں بہتری اور شہریوں کو معیاری سہولیات کی فراہمی کے لیے مؤثر اقدامات کیے جائیں گے تاکہ عوام کو حقیقی معنوں میں ریلیف مل سکے۔
