جہلم: میونسپل کمیٹی جہلم میں رمضان نگہبان پیکیج کی رجسٹریشن کے لیے آنے والی خواتین دربدر کی ٹھوکریں کھانے پر مجبور ہیں۔ خواتین نے عملے کے رویے اور سفارشی رجسٹریشن پر دہائی دیتے ہوئے وزیراعلیٰ پنجاب مریم نواز شریف سے نوٹس لینے کا مطالبہ کیا ہے۔
تفصیلات کے مطابق وزیراعلیٰ پنجاب کے حکم پر رمضان نگہبان پیکیج کی رجسٹریشن کے لیے میونسپل کمیٹی جہلم میں ایک کیمپ آفس قائم کیا گیا ہے، جہاں خواتین صبح سویرے چھوٹے بچوں کو گھروں میں چھوڑ کر اپنی رجسٹریشن کروانے کے لیے پہنچتی ہیں۔ تاہم ان کا کہنا ہے کہ گھنٹوں قطار میں کھڑے رہنے کے باوجود ان کی باری نہیں آتی۔
خواتین نے شکایت کی کہ رجسٹریشن پر مامور عملہ سفارشی خواتین کی رجسٹریشن پہلے کرتا ہے جبکہ عام خواتین کو مسلسل نظرانداز کیا جا رہا ہے۔ اس صورت حال سے مایوس ہو کر کئی خواتین بنا رجسٹریشن کے واپس جانے پر مجبور ہو جاتی ہیں۔
خواتین نے وزیراعلیٰ پنجاب مریم نواز شریف سے اس صورتحال کا فوری نوٹس لینے اور رجسٹریشن عملے میں اضافے کا مطالبہ کیا ہے تاکہ تمام مستحق خواتین کو آسانی سے رجسٹریشن کا موقع مل سکے۔ ان کا کہنا ہے کہ رمضان المبارک کے دوران اس پیکیج کی اہمیت بڑھ جاتی ہے اور حکومت کو عوام کو سہولت فراہم کرنے کے اقدامات بہتر بنانے چاہئیں۔
