سوہاوہ: بورڈ آف انٹرمیڈیٹ اینڈ سیکنڈری ایجوکیشن راولپنڈی کے زیر انتظام پہلا سالانہ امتحان میٹرک 2024 یکم مارچ سے شروع ہوں گے۔ بڑاگواہ،مغل آباد،ججیال،ڈومیلی،جنڈالہ میں بھی امتحانی سنٹر قائم، عملہ امتحانی سنٹروں پر پہنچ گیا، نقل کی روک تھام کیلئے سخت انتظامات کئے گئے ہیں۔
تفصیلات کے مطابق بورڈ آف انٹرمیڈیٹ اینڈ سیکنڈری ایجوکیشن راولپنڈی کے زیر انتظام پہلا سالانہ امتحان میٹرک 2024 یکم مارچ بروز جمعہ سے شروع ہورہے ہیں، تمام انتظامات مکمل کرلئے گئے ہیں۔
امتحان کو فول پروف اور ہر لحاظ سے صاف شفاف بنانے کیلئے تمام امتحانی عملے بشمول ریذیڈنٹ اور ڈسٹری بیوٹرانسپکٹرز سپرنٹنڈنٹ ڈپٹی سپرنٹنڈنٹ اور نگرانوں کے ریکارڈ کی چھان بین کیلئے لسٹیں مرتب کرکے سپیشل برانچ اورانٹیلی جنس بیورو کو بھیج دی گئی ہیں تاکہ دورانِ امتحان ان کو مانیٹر کیا جاسکے۔
بڑاگواہ،جنڈالہ،ڈومیلی،مغل آباد اور ججیال میں امتحانی سنٹر قائم کردیئے گئے جبکہ عملہ امتحانی سنٹروں پر پہنچ گیا، نقل کی روک تھام کیلئے سخت انتظامات کئے گئے ہیں۔
چیئرمین بورڈ محمد عدنان خان اور کنٹرولر امتحانات پروفیسر ساجد محمود فاروقی نے مشترکہ اعلامیہ جاری کرتے ہوئے کہا کہ بورڈ کے تمام وسائل کو بروئے کار لاتے ہوئے تحصیل ، ضلعی اور ڈویژنل انتظامیہ کے تعاون سے بوٹی اور نقل مافیا کو ختم کریں گے۔
انہوں نے مزید کہا کہ کمشنر راولپنڈی کی طرف سے تمام اضلاع کے ڈپٹی کمشنر ز ایڈیشنل کمشنرز اور اسسٹنٹ کمشنرز کو ہدایات جاری کی گئی ہے کہ تمام امتحانی مراکز کی مانیٹرنگ روزانہ کی بنیاد پر کی جائے اور تمام افسران(SF-2) پر اپنی حاضری کے ساتھ ریمارکس بھی تحریر کریں۔ امتحانی سینٹر کی مانیٹرنگ سخت اور جامع کریں تاکہ امتحان خو ش اسلوبی سے مکمل ہوسکے۔
مزید برآں چیئرمین بورڈ اور کنٹرولر امتحانات نےراولپنڈی ڈویژن میں بورڈ کی طرف سے قائم کی گئی ہر ضلعی سطح پر چھ ویجیلینس کمیٹیوں کے فوکل پرسنز اور ممبران کو امتحانی ایس او پیز کے متعلق ہدایات جاری کیں۔
تما م امتحانی مراکز میں چیئرمین سکواڈ اسپیشل سکواڈ موبائل انسپکٹر اور یجیلینس کمیٹیاں روزانہ کی بنیاد پر امتحانی مراکز کی انسپکشن کرکے اپنی رپورٹ بورڈآفس کو ارسال کریں گی اور ان رپورٹس کی بنیاد پر امتحانات کو مزید بہتر بنایا جائے گا اور شکایات کا فوری ازالہ کیا جائے گا۔
بورڈآفس میں مرکزی کنٹرول روم اور ہر ضلعی سطح پر چیف ایگزیٹو آفس میں کنٹرول روم قائم کردیا گیا ہے۔
(0515450917,0515450918,0515450923)
آخر میں چیئرمین تعلیمی بورڈ راولپنڈی اور کنٹرولر امتحانات نے تمام امتحانی عملہ کو کہا کہ اپنی ڈیوٹی انتہائی ایمانداری اور جانفشانی سے سرانجام دیں تاکہ پرامن ماحول میں فول پروف امتحان منعقد ہوسکے۔
