جہلم: شہیدوں اور غازیوں کی سرزمین ضلع جہلم کا ایک اور بہادر سپوت مادرِ وطن پر قربان ہو گیا۔
تفصیلات کے مطابق جہلم کی تحصیل سوہاوہ کے علاقے ڈومیلی سے تعلق رکھنے والے پاک فوج کے بہادر سپوت نائب صوبیدار ندیم اصغر بلوچستان کے علاقے تربت میں فتنۃ الخوارج کے خلاف انٹیلیجنس بیسڈ آپریشن کے دوران جامِ شہادت نوش کر گئے۔
شہید نائب صوبیدار ندیم اصغر کا تعلق ڈومیلی کے گاؤں ڈھوک شیرا سے تھا، جو دہشت گردوں کے خلاف بہادری سے لڑتے ہوئے شہید ہوئے۔ شہید کی نمازِ جنازہ ان کے آبائی گاؤں میں ادا کی گئی جس میں پاک فوج کے افسران، سیاسی، سماجی و مذہبی شخصیات اور اہلِ علاقہ کی بڑی تعداد نے شرکت کی اور شہید کو خراجِ عقیدت پیش کیا۔
نمازِ جنازہ کے بعد شہید ندیم اصغر کو پورے فوجی اعزاز کے ساتھ سپردِ خاک کیا گیا، پاک فوج کے چاق و چوبند دستے نے سلامی پیش کی اور قبر پر پھولوں کی چادریں چڑھائی گئیں۔
شہید نے سوگواران میں والدین، بیوہ، ایک بیٹا اور ایک بیٹی چھوڑے ہیں۔ اس موقع پر شہید کے والد نے کہا کہ ان کے بیٹے نے ملک و قوم کی خاطر اپنی جان کا نذرانہ دے کر ان کا سر فخر سے بلند کر دیا ہے۔
انہوں نے کہا کہ یہ قربانی اس بات کا ثبوت ہے کہ وطن کی حفاظت کے لیے اس دھرتی کے بیٹے کسی بھی قربانی سے دریغ نہیں کریں گے۔
