حکومت نے آئی ایم ایف کو بجلی ٹیرف میں بروقت اضافے کی یقین دہانی کرا دی ہے، بجلی کی قیمتوں میں یکم جولائی سے مزید اضافے کا امکان ہے۔
میڈیا رپورٹس کے مطابق 3 ارب ڈالرکے اسٹینڈ بائی ارینجمنٹ کے تحت 1 اعشاریہ 1 ارب ڈالر کی اگلی قسط کے حصول کے مشن میں پاکستان اور آئی ایم ایف کے درمیان اقتصادی جائزہ مذاکرات میں پیش رفت ہوئی ہے۔
ذرائع وزارت خزانہ کا کہنا ہے کہ فریقین کے درمیان اگلے ہفتے کے اوائل میں اسٹاف کی سطح پر معائدے کا امکان ہے۔ حکومت نے بجلی ٹیرف میں بروقت اضافے کی یقین دہانی کرا دی، بجلی کی قیمتوں میں یکم جولائی سے مزید اضافے کا امکان ہے۔
وزارتِ خزانہ کے ذرائع کے مطابق کاسٹ ریکوری کیلئے ماہانہ، سہ ماہی اور سالانہ ایڈجسٹمنٹ کی جائے گی۔ ٹیکس ریونیو بڑھانے کیلئے معیشت کو بتدریج دستاویزی شکل دینے کی بھی یقین دہانی کرائی گئی۔
ذرائع کے مطابق آئی ایم ایف نے بی آئی ایس پی کے تحت مستحقین کا تحفظ یقینی بنانے پر زور دیدیا، حکومت کی جانب سے بی آئی ایس پی مستحقین کی تعداد جون تک مزید بڑھانے کی یقین دہانی کرائی گئی اور معاشی استحکام کے تسلسل کیلئے ضروری اصلاحات جاری رکھنے پر زور دیا گیا۔
ذرائع نے بتایا کہ آئی ایم ایف نے سخت مانیٹری پالیسی اورمارکیٹ بیسڈ ایکسچینج ریٹ کی پالیسی برقرار رکھنے کا مطالبہ کیا ہے۔ مذاکرات کی کامیاب تکمیل پر ایگزیکٹیو بورڈ کی منظوری سے پاکستان کو 1 اعشاریہ 1 ارب ڈالر کی آخری قسط ملے گی۔
