پنڈدادنخان کی عدالت نے منشیات فروشی کے دو مقدمات کا فیصلہ سناتے ہوئے جرم ثابت ہونے پر ملزم کو مجموعی طور پر 18 سال قید اور ایک لاکھ 60 ہزار روپے جرمانے کی سزا سنا دی۔
ترجمان جہلم پولیس کے مطابق جہلم کی تحصیل پنڈدادنخان میں عدالت نے مقدمہ نمبر 494/22 اور 232/23 بجرم CNSA دفعہ 9(1)3C، تھانہ پنڈدادنخان کا فیصلہ سنایا۔ مقدمات کے مطابق مجرم غلام رضا منشیات فروشی کے جرم میں ملوث تھا۔
پولیس کے مطابق کارروائی کے دوران ملزم کو ٹریس کر کے گرفتار کیا گیا، جبکہ مکمل اور ٹھوس شواہد کے ساتھ چالان عدالت میں پیش کیا گیا۔ مقدمے کی مؤثر پیروی کے نتیجے میں معزز عدالت نے جرم ثابت ہونے پر دونوں مقدمات میں مجموعی طور پر 18 سال قید اور ایک لاکھ 60 ہزار روپے جرمانے کی سزا سنائی۔
ترجمان جہلم پولیس کا کہنا ہے کہ منشیات فروش معاشرے کے لیے ایک سنگین ناسور ہیں، جن کے خلاف بلاامتیاز کارروائیاں جاری ہیں تاکہ نوجوان نسل کو اس لعنت سے محفوظ بنایا جا سکے۔
ڈسٹرکٹ پولیس آفیسر (ڈی پی او) شفیق احمد چوہدری نے کہا کہ ضلع بھر میں منشیات فروشوں کے خلاف کریک ڈاؤن بھرپور انداز میں جاری رہے گا اور قانون شکن عناصر کو انصاف کے کٹہرے میں لا کر قرار واقعی سزا دلانے کے لیے ہر ممکن اقدامات کیے جائیں گے۔
