سوہاوہ/ دینہ: سوہاوہ میں کار پل سے نیچے جا گری، حادثے میں دینہ کی مذہبی شخصیت جاں بحق جبکہ ان کے دو بیٹے شدید زخمی ہو گئے۔
تفصیلات کے مطابق جہلم کی تحصیل سوہاوہ میں کچہری کے قریب ترکی ٹول پلازہ کے نزدیک ایک تیز رفتار کار بے قابو ہو کر پلی سے نیچے جا گری، جس کے نتیجے میں دینہ کے علاقے سید حسین سے تعلق رکھنے والے نیریاں شریف کے خلیفہ مظہر اقبال صدیقی جاں بحق جبکہ ان کے دو بیٹے فرید اقبال اور جاوید اقبال شدید زخمی ہو گئے۔
ریسکیو 1122 کے مطابق حادثے کی اطلاع ملتے ہی امدادی ٹیمیں فوری طور پر جائے وقوعہ پر پہنچیں۔ حادثے میں ایک شخص جاں بحق اور دو افراد زخمی ہوئے۔ ریسکیو اہلکاروں نے زخمیوں کو ابتدائی طبی امداد فراہم کی جبکہ جاں بحق شخص کی میت کو تحصیل ہیڈکوارٹر ہسپتال سوہاوہ منتقل کیا گیا۔
عینی معلومات کے مطابق دینہ کی جانب سے آنے والی کار جب سوہاوہ میں ترکی ٹول پلازہ کے قریب جی ٹی روڈ پر پل پر پہنچی تو اچانک بے قابو ہو کر پل سے نیچے جا گری۔ حادثہ اتنا شدید تھا کہ کار کو شدید نقصان پہنچا۔
حادثے کے نتیجے میں مظہر اقبال صدیقی زخموں کی تاب نہ لاتے ہوئے خالق حقیقی سے جا ملے، جبکہ فرید اقبال اور جاوید اقبال کو شدید چوٹیں آئیں۔ دونوں زخمیوں کو ریسکیو 1122 کے اہلکاروں نے ابتدائی طبی امداد دینے کے بعد ٹی ایچ کیو ہسپتال سوہاوہ منتقل کیا، جہاں سے بعد ازاں انہیں مزید علاج کے لیے میرپور آزاد کشمیر کے ہسپتال منتقل کر دیا گیا۔
