پنڈدادنخان کے معروف قصبہ جلال پور شریف کے قریب ڈھیری آرائیاں کے مقام پر زیر تعمیر للِہ تا جہلم ڈبل کیرج وے کی صورتحال انتہائی خراب ہو گئی ہے۔ جگہ جگہ کیچڑ اور بارشی پانی جمع ہونے سے سڑک تالاب کا منظر پیش کر رہی ہے جس کے باعث ٹرانسپورٹرز اور عام شہری سخت مشکلات سے دوچار ہیں۔
سڑک پر بڑے بڑے گڑھے اور نکاسی آب کے مؤثر انتظام نہ ہونے کی وجہ سے ٹریفک کی روانی بری طرح متاثر ہو رہی ہے۔ مقامی شہریوں اور ٹرانسپورٹرز کے مطابق زیر تعمیر مین شاہراہ کی خستہ حالی کے باعث موٹر سائیکل سوار، رکشہ ڈرائیورز اور دیگر چھوٹی بڑی گاڑیوں کو گزرنے میں شدید دشواری پیش آ رہی ہے، جبکہ آئے روز حادثات معمول بن چکے ہیں۔
علاقہ مکینوں کا کہنا ہے کہ سڑک پر جمع پانی اور کیچڑ انتظامیہ کی غفلت کا واضح ثبوت ہے اور عوامی مشکلات کو نظر انداز کیا جا رہا ہے۔ شہریوں نے اعلیٰ حکام سے فوری نوٹس لینے، نکاسی آب کے مؤثر انتظامات کرنے اور منصوبے کو جلد از جلد مکمل کرنے کا مطالبہ کیا ہے تاکہ مزید حادثات اور مسائل سے بچا جا سکے۔
