جہلم: ڈپٹی کمشنر جہلم میثم عباس نے سول لائنز روڈ کا دورہ کرتے ہوئے "ستھرا پنجاب پروگرام” کے تحت جاری صفائی مہم کا تفصیلی جائزہ لیا۔
اس موقع پر انہوں نے موقع پر موجود سینٹری اسٹاف اور سپروائزرز سے ملاقات کی اور صفائی کی موجودہ صورتحال کا معائنہ کیا۔ دورے کے دوران سپروائزر نے ڈپٹی کمشنر کو صفائی کے انتظامات اور اقدامات کی تفصیلات سے آگاہ کیا۔
ڈپٹی کمشنر نے واضح ہدایت دی کہ "ستھرا پنجاب مہم” کے تحت شہر کی تمام گلیوں، محلوں اور کچرے کے ڈمپنگ پوائنٹس کی مکمل صفائی یقینی بنائی جائے تاکہ شہریوں کو صاف ستھرا ماحول فراہم کیا جا سکے۔
انہوں نے مزید کہا کہ ویسٹ مینجمنٹ کمپنی کی بنیادی ذمہ داری ہے کہ وہ شہریوں کی شکایات کے اندراج سے قبل ہی صفائی کے موثر انتظامات کرے۔ روزانہ کی بنیاد پر نالوں، سیوریج سسٹم اور دیگر عوامی مقامات کی صفائی کو یقینی بنایا جائے تاکہ صفائی کے معیار کو بہتر بنایا جا سکے۔
ڈپٹی کمشنر میثم عباس نے خبردار کیا کہ ضلعی انتظامیہ "ستھرا پنجاب مہم” کی سخت نگرانی کر رہی ہے اور کسی بھی قسم کی کوتاہی یا لاپرواہی کو ہرگز برداشت نہیں کیا جائے گا۔ انہوں نے تمام متعلقہ محکموں کو ہدایت دی کہ وہ اپنی ذمہ داریاں بھرپور طریقے سے ادا کریں تاکہ شہر کے رہائشیوں کو صاف اور صحت مند ماحول میسر آ سکے۔
