جہلم: شدید گرمی اور ہیٹ ویو کے خطرات کے پیش نظر معروف طبی ماہر ڈاکٹر شاہد سہیل نے شہریوں کو محتاط رہنے کی پرزور اپیل کی ہے۔
میڈیا نمائندوں سے خصوصی گفتگو میں انہوں نے کہا کہ "ہیٹ ویو ایک خاموش قاتل ہے” اور اس موسم میں خود کو محفوظ رکھنا ہر شہری کی اولین ترجیح ہونی چاہیے۔
ڈاکٹر شاہد سہیل کے مطابق موجودہ موسم میں درجہ حرارت خطرناک حد تک بڑھ چکا ہے، جس کے باعث اسپتالوں میں ہیٹ اسٹروک، پانی کی کمی (ڈی ہائیڈریشن)، بلڈ پریشر میں اتار چڑھاؤ اور بے ہوشی کے کیسز میں تشویشناک اضافہ دیکھنے میں آیا ہے۔
انہوں نے کہا کہ یہ تمام مسائل شہریوں کی جانب سے احتیاطی تدابیر اختیار نہ کرنے کا نتیجہ ہیں۔ شہریوں سے گزارش کی گئی ہے کہ دن کے وقت خاص طور پر 11 بجے سے شام تک غیر ضروری طور پر گھروں سے باہر نکلنے سے گریز کریں۔ اگر باہر جانا ناگزیر ہو تو سر اور جسم کو مکمل طور پر ڈھانپ کر نکلیں۔
ڈاکٹر شاہد سہیل نے کہا کہ ہلکے رنگ کے اور ڈھیلے کپڑے پہنیں۔ زیادہ سے زیادہ پانی اور مشروبات کا استعمال کریں۔ دھوپ میں کام کرنے والوں کے لیے وقفے وقفے سے سائے میں آرام کرنا ضروری ہے۔
ڈاکٹر شاہد سہیل نے درخت لگانے پر بھی زور دیتے ہوئے کہا کہ "درختوں کی دیکھ بھال اولاد کی طرح کرنی چاہیے، کیونکہ یہ نہ صرف ماحول کو بہتر بناتے ہیں بلکہ شہریوں کو قدرتی سایہ اور ٹھنڈک بھی فراہم کرتے ہیں”۔
انہوں نے متعلقہ اداروں سے اپیل کی کہ گرمی سے بچاؤ کے لیے آگاہی مہم کو مزید مؤثر بنایا جائے تاکہ عوام الناس خود کو موسمی شدت سے بچا سکیں اور ہیٹ ویو سے ممکنہ نقصانات سے محفوظ رہیں۔
