جہلم: ڈپٹی کمشنر جہلم میر رضا اوزگن نے ڈی سی کمپلیکس کے مختلف محکموں کے سرکاری ملازمین سے ایک اہم ملاقات کی جس میں انہوں نے عوامی خدمت کے معیار اور سرکاری امور کی بہتری پر تفصیلی گفتگو کی۔
اس موقع پر ڈپٹی کمشنر میر رضا اوزگن نے واضح کیا کہ ضلعی انتظامیہ کا اولین مقصد شہریوں کو فوری اور مؤثر ریلیف فراہم کرنا ہے۔ انہوں نے کہا کہ عوامی شکایات کے ازالے میں کسی قسم کی غیر ضروری تاخیر یا سستی ہرگز قابلِ قبول نہیں ہوگی۔
ڈپٹی کمشنر نے تمام ملازمین کو ہدایت کی کہ وہ اپنی ذمہ داریاں ایمانداری، محنت اور دیانتداری کے ساتھ انجام دیں، عوامی شکایات کو فوری طور پر حل کریں اور دفاتر میں حاضری اور وقت کی پابندی کو یقینی بنائیں۔
انہوں نے مزید کہا کہ ضلعی انتظامیہ عوام کے اعتماد کی امین ہے، اور صرف مؤثر کارکردگی، نظم و ضبط اور خلوص نیت کے ساتھ کام کرنے سے ہی عوام کا اعتماد بحال رکھا جا سکتا ہے۔
آخر میں میر رضا اوزگن نے خبردار کیا کہ غفلت یا کوتاہی برتنے والے اہلکاروں کے خلاف سخت کارروائی عمل میں لائی جائے گی۔
