پنڈدادنخان: ایس ایس پی اشرف مارتھ شہید کی 27 ویں برسی کے موقع پر ڈپٹی کمشنر منڈی بہاؤالدین شاہد عمران مارتھ، ایس پی انویسٹی گیشن جہلم محمد حسیب راجہ نے شہید کی قبر پر پھول چڑھائے اور فاتحہ خوانی کی۔
پولیس کے چاک وچوبند دستے نے موضع سگھرپور جلالپور شریف میں ایس ایس پی اشرف مارتھ شہید کی لحد پر حاضری دی اور شہیدسلامی پیش کی۔
ڈپٹی کمشنر منڈی بہاؤالدین اور ایس پی انویسٹیگیشن جہلم نے شہید کی قبر پر پھول چڑھائے اوردرجات کی بلندی کے لیے دعاکی۔
یاد رہے کہ ایس ایس پی اشرف مارتھ دہشت گروں کی اندھا دھند فائرنگ سے 6 مئی 1997 کی صبح گوجرانولہ میں شدید زخمی ہو کر جام شہادت نوش فرما گئے تھے۔ اشرف مارتھ شہید کی بے مثال بہادری کے اعتراف میں حکومت کی جانب سے ان کو ستارہ شجاعت سے نوازا اور گوجرانوالہ پولیس لائنز کو ان کے نام سے منسوب کیا گیا ہے۔
اس موقع پر ڈپٹی کمشنر منڈی بہاؤالدین شاہد عمران مارتھ اور ایس پی انویسٹی گیشن جہلم حسیب راجہ نے کہا کہ ایس ایس پی اشرف مارتھ شہید ایک بہادر اور نڈر آفیسر تھے، جن کی خدمات ہمیشہ یاد رکھی جائیں گی۔ شہداء ہمارے محسن ہیں،شہداء کی لازوال قربانیاں ناقابل فراموش ہیں۔
ڈی پی او جہلم ناصر محمود باجوہ نے کہا کہ شہداء کی لازوال قربانیوں کی بدولت ہم امن و سکون سے زندگی گزار رہے ہیں ، شہدا کی فیملیز ہماری ذمہ داری ہیں جن کا بھرپور خیال رکھا جائے گا۔
