پنڈدادنخان: کھیوڑہ سالٹ رینج ایریا میں مائن کی لیز منسوخی کے خلاف پی ایم ڈی سی کھیوڑہ پروجیکٹ کے ورکرز، مائنرز یونین اور مقامی کمیونٹی نے بھرپور اور پُرامن احتجاج ریکارڈ کروایا۔
پی ایم ڈی سی ورکرز یونین کی قیادت میں ہونے والے احتجاج میں مزدوروں، یونین عہدیداران اور کھیوڑہ کی لوکل کمیونٹی نے بڑی تعداد میں شرکت کر کے یکجہتی کا مظاہرہ کیا۔
مقررین نے خطاب کرتے ہوئے کہا کہ ادارہ مسلسل منافع میں جا رہا ہے اور تمام ٹیکسز اور رائلٹی باقاعدگی سے ادا کی جا رہی ہیں، اس کے باوجود لیز کی منسوخی کا فیصلہ مزدور دشمن اقدام ہے۔ انہوں نے حکومتِ پنجاب اور وفاقی قیادت سے مطالبہ کیا کہ اس فیصلے کو فوری واپس لیا جائے تاکہ محنت کش طبقے کا روزگار محفوظ رہ سکے۔
احتجاج سے مائنرز یونین کے جنرل سیکرٹری مرزا ضمیر حسین، ورکرز یونین کے صدر مرزا عمران عباس، جوائنٹ سیکرٹری عابد حسین، ملک آصف، ملک ظفر اقبال سمیت دیگر رہنماؤں نے خطاب کیا اور پی ایم ڈی سی کے حق میں نعرے لگائے۔
مقررین نے واضح کیا کہ احتجاج پُرامن ہے، تاہم مطالبات منظور نہ ہونے کی صورت میں مزدور طبقہ مزید سخت احتجاج کا حق محفوظ رکھتا ہے۔
اختتام پر قاری محمد رفیق نے ملک و قوم کی سلامتی، ترقی اور خوشحالی کے لیے خصوصی دعا کروائی، جبکہ کھیوڑہ کی مقامی کمیونٹی نے بھی مائنرز ورکرز کے ساتھ مکمل یکجہتی کا اعلان کرتے ہوئے ہر مشکل گھڑی میں ساتھ دینے کے عزم کا اظہار کیا۔
