جہلم پولیس نے ضلع بھر میں امن و امان کے قیام، جرائم پیشہ عناصر کی سرکوبی اور اہم تنصیبات کی سیکیورٹی کو مزید مؤثر بنانے کے لیے خصوصی سرچ آپریشنز اور ناکہ بندیوں کا انعقاد کیا۔
ترجمان جہلم پولیس کے مطابق ضلع بھر میں 14 مختلف مقامات پر سرچ آپریشنز کیے گئے، جن کے دوران 440 افراد، 177 گھروں اور 13 ہوٹلوں و بس اسٹینڈز کی چیکنگ عمل میں لائی گئی۔
سرچ آپریشن کے دوران تھانہ ڈومیلی کے علاقے میں کارروائی کرتے ہوئے ناجائز اسلحہ رکھنے والے ایک ملزم کو گرفتار کر لیا گیا۔ پولیس نے ملزم کے قبضے سے 32 بور ریوالور بمعہ ایمونیشن برآمد کر کے قانونی کارروائی کا آغاز کر دیا ہے۔
اسی دوران پولیس نے بوگس چیک کے مقدمے میں مطلوب ایک اشتہاری ملزم کو بھی گرفتار کر لیا، جو کافی عرصے سے قانون کی گرفت سے بچنے کی کوشش کر رہا تھا۔ گرفتار ملزم کے خلاف مزید قانونی کارروائی جاری ہے۔
پولیس حکام کے مطابق سرچ آپریشنز کا مقصد دہشت گردوں، جرائم پیشہ عناصر اور مشتبہ سرگرمیوں میں ملوث افراد کے خلاف مؤثر کارروائی کرتے ہوئے شہریوں کے جان و مال کا تحفظ یقینی بنانا ہے۔ اس سلسلے میں ضلع بھر کے مختلف علاقوں میں چیکنگ اور نگرانی کے عمل کو مزید سخت کیا گیا ہے۔
جہلم پولیس نے شہریوں سے اپیل کی ہے کہ وہ اپنے اردگرد کے ماحول پر کڑی نظر رکھیں اور کسی بھی مشکوک شخص، غیر قانونی طور پر مقیم افراد یا جرائم پیشہ سرگرمیوں میں ملوث عناصر کے بارے میں فوری طور پر پولیس کو اطلاع دیں۔
ترجمان کے مطابق بروقت اطلاع نہ صرف کسی بڑے جرم یا ناخوشگوار واقعہ کو رونما ہونے سے روک سکتی ہے بلکہ معاشرے میں امن و امان کے قیام میں بھی اہم کردار ادا کرتی ہے۔
پولیس نے شہریوں سے مزید کہا ہے کہ اگر ان کے علم میں کوئی ایسا شخص آئے جو بغیر کوائف کے رہائش پذیر ہو، مشتبہ سرگرمیوں میں ملوث ہو یا قانون کی خلاف ورزی کر رہا ہو تو فوری طور پر قریبی تھانے یا پولیس ہیلپ لائن 15 پر اطلاع دیں تاکہ بروقت قانونی کارروائی عمل میں لائی جا سکے۔
جہلم پولیس کے مطابق جرائم پیشہ عناصر، اشتہاری مجرمان اور قانون شکن افراد کے خلاف کریک ڈاؤن آئندہ بھی بلا تعطل جاری رکھا جائے گا تاکہ ضلع بھر میں امن و امان کی فضا برقرار رکھی جا سکے۔
