جہلم: ڈپٹی کمشنر جہلم میثم عباس کی زیر صدارت ڈسٹرکٹ پلاننگ اینڈ ڈیزائن کمیٹی کا اجلاس ڈی سی آفس میں منعقد ہوا، جس میں ضلع کونسل اور میونسپل کمیٹی کی جانب سے متعدد کمرشل عمارتوں کے نقشے منظوری کے لیے پیش کیے گئے۔
اجلاس میں ان عمارتوں کے نقشوں کا جائزہ لیا گیا جن کے لیے قانونی تقاضے مکمل کیے جا چکے تھے۔ متعلقہ سرکاری ریکارڈ اور دستاویزات فراہم کرنے والی عمارتوں کے نقشے منظور کر لیے گئے جبکہ جن عمارتوں کے کاغذات نامکمل تھے، انہیں جلد از جلد مطلوبہ قانونی دستاویزات مکمل کرنے کی ہدایت کی گئی۔
اس موقع پر ڈپٹی کمشنر میثم عباس نے کہا کہ کمرشل عمارتوں کی تعمیر کے دوران قانون کی پاسداری ہر صورت میں لازم ہے۔ غیر قانونی تعمیرات یا بغیر منظوری کے نقشے پر بننے والی عمارتوں کو تجاوزات آپریشن کا سامنا کرنا پڑ سکتا ہے، لہٰذا تمام قانونی تقاضے پورے کر کے نقشے کی منظوری حاصل کی جائے۔
انہوں نے مزید کہا کہ ضلعی انتظامیہ اس پورے عمل کی سخت نگرانی کر رہی ہے اور غیر قانونی تعمیرات کے خلاف سخت کارروائی عمل میں لائی جائے گی۔
اجلاس میں متعلقہ محکموں کے افسران اور دیگر متعلقہ حکام نے بھی شرکت کی جہاں شہر کی ترقیاتی منصوبہ بندی اور قانونی تقاضوں پر تبادلہ خیال کیا گیا۔
