جہلم: ضلعی انتظامیہ اشیاء خوردونوش سمیت روزمرہ کے استعمال کی چیزوں کی قیمتوں کو کنٹرول کرنے میں بری طرح ناکام ہو گئی۔
عید قربان سے2 روز قبل گراں فروشوں نے اشیاء خوردونوش کی قیمتوں میں من مانا اضافہ کرکے فروخت شروع کردی جبکہ عید کی چھٹیوں کے دوران شہریوں کو ریلیف مہیا کرنے والے پرائس کنٹرول مجسٹریٹس کہیں نظر نہ آئے، جس کا گراں فروشوں نے خوب فائدہ اٹھایا اور یہ سلسلہ 21 جون بروز جمعہ تک جاری رہا۔
انتظامیہ کے پاس پرائس کنٹرول کے لئے جو افسران کی فوج موجود ہے جو صرف خانہ پری کر کے چند ایک ریڑھی بانوں ، چھابڑی فروشوں کو جرمانے کرنے کے بعد چین کی بانسری بجاتے ہیں وہ عملی طور پر کہیں دکھائی نہیں دیتے۔ پرائس کنٹرول کے اجلاس کے بعد تصاویر اور پریس ریلیز انتظامیہ کی طرف سے جاری کردی جاتی ہے لیکن سرکاری نرخ ناموں پر ضلع بھر میں کہیں عملدرآمد ہوتا نظر نہیں آتا۔
شہری، سماجی، رفاعی اور فلاحی تنظیموں کے عمائدین نے ڈپٹی کمشنر سے مطالبہ کیاہے کہ شہر سمیت ملحقہ علاقوں کا سرپرائز وزٹ کیا جائے اور خریداری کی جائے تو گراں فروشی کے مرتکب دکاندار منظرعام پر آسکیں گے ۔
