جہلم: خواتین میں چھاتی کے سرطان کی شرح اموات تشویشناک حد تک بڑھ رہی ہے، اس مرض سے آگاہی اور بروقت تشخیص کے حوالے سے گورنمنٹ گریجویٹ کالج ٹاہلیا نوالہ میں جہلم میں سیمینار کا انعقاد کیا گیا۔
گورنمنٹ گریجویٹ کالج ٹاہلیا نوالہ میں پاکستان اٹامک انرجی کمیشن کی جانب سے چھاتی کے کینسر سے آگاہی کے لئے سیمینار کا انعقاد کیا گیا۔سیمینار میں کینسر ہسپتالوں میں علاج و معالجے اور دستیاب سہولیات کے بارے میں شرکاء کو آگاہ کیا۔
ڈاکٹر عاصمہ سہیل (ڈائریکٹر اٹامک انرجی کینسرہسپتال) نے اساتذہ اور طالبات کو چھاتی کے سرطان کی ابتدائی سٹیج میں تشخیص علامات اور احتیاظی تدابیرپرتفصیلی لیکچر دیا اور کہا کہ خواتین کو برھتی عمر کے ساتھ میمو گرافی لازمی کرانی چاہئے۔
ڈاکٹر شازیہ فاطمہ (ایگزیکٹو ڈائریکٹر)نے کہا کہ پاکستان اٹامک انرجی کمیشن کے19ہسپتال کینسر کی تشخیص اور علاج کا کام کرتی ہے۔
ڈاکٹر شہزانہ (بانی و چیئرمین مہربانی ویلفیئر فاؤنڈیشن)نے ا ٹامک انرجی کمیشن ٹیم کا شکریہ ادا کرتے ہوئے کہا کہ ایسے سیمینار کی آگاہی سے کینسر جیسے مرض کا خاتمہ ممکن ہے۔ اٹامک انرجی کینسر ہسپتال گوجرانوالہ انسٹیٹیوٹ آف نیوکئیر میڈیسن کے تعاون سے میڈیکل کیمپ بھی لگایا گیا جس میں مریضوں کے معائنے کے ساتھ ساتھ الٹراساؤنڈ اور میموگرافی بھی کی گئی۔
سیمینار میں بیگم چیئرمین اٹامک انرجی کمیشن، پی ایم اے کے ڈاکٹر ز، اساتذہ اور طالبات کی بڑی تعداد نے شرکت کی۔ پرنسپل ڈاکٹر شاہد سعید نے مہمانوں کو یادگاری شیلڈز پیش کیں۔
