جہلم: نیشنل ہائی ویز اینڈ موٹروے پولیس (NHMP) کی جانب سے موٹر سائیکل سواروں کی جان و مال کے تحفظ اور ٹریفک قوانین پر عمل درآمد کے لیے ’’چالان نہیں، ہیلمٹ‘‘ کے عنوان سے خصوصی آگاہی مہم کا انعقاد کیا گیا۔
جی ٹی روڈ دریائے جہلم پل ٹول پلازہ کے مقام پر منعقدہ مہم کے دوران بغیر ہیلمٹ موٹر سائیکل چلانے والے ڈرائیورز کو جرمانہ کرنے کے بجائے موقع پر ہی مفت حفاظتی ہیلمٹ پہنائے گئے اور انہیں ٹریفک قوانین کی پابندی کی تلقین کی گئی۔
مہم کے دوران ایس پی زاہد نذیر وریا اور ڈپٹی سپرنٹنڈنٹ محمد عمران محمود نے موٹر سائیکل سواروں سے ملاقات کی اور انہیں ہیلمٹ کے درست استعمال، دورانِ سفر احتیاط اور ٹریفک قوانین پر عمل درآمد کی اہمیت سے آگاہ کیا۔
اس موقع پر ایس پی زاہد نذیر وریا نے کہا کہ ہیلمٹ محض ٹریفک قانون کی پابندی نہیں بلکہ موٹر سائیکل سوار کی زندگی کا محافظ ہے۔ حادثے کی صورت میں معیاری ہیلمٹ سر کو شدید چوٹ سے محفوظ رکھنے میں اہم کردار ادا کرتا ہے۔ انہوں نے شہریوں پر زور دیا کہ وہ موٹر سائیکل چلاتے وقت خود بھی ہیلمٹ پہنیں اور اپنے ساتھ سفر کرنے والے افراد کو بھی ہیلمٹ کے استعمال کا پابند بنائیں۔
ڈپٹی سپرنٹنڈنٹ محمد عمران محمود نے کہا کہ موٹروے پولیس کا مقصد صرف چالان کرنا نہیں بلکہ شہریوں میں ٹریفک قوانین اور روڈ سیفٹی کے حوالے سے شعور اجاگر کرنا بھی ہے۔ اسی سوچ کے تحت بغیر ہیلمٹ سفر کرنے والے موٹر سائیکل سواروں کو سزا دینے کے بجائے انہیں ہیلمٹ فراہم کرکے اس کے درست استعمال اور انسانی جان کے تحفظ میں اس کی اہمیت سے آگاہ کیا جا رہا ہے۔
مہم کے دوران ایس پی زاہد نذیر وریا نے شہریوں میں حفاظتی ہیلمٹ اور سائیڈ ویو مررز بھی تقسیم کیے اور موٹر سائیکل سواروں کو دورانِ سفر احتیاط، رفتار پر قابو رکھنے اور ٹریفک قوانین کی مکمل پابندی کی ہدایت کی۔
موٹروے پولیس حکام کا کہنا تھا کہ ایک معمولی سی احتیاط قیمتی انسانی جان بچانے کا سبب بن سکتی ہے، اس لیے ہیلمٹ کو بوجھ نہیں بلکہ زندگی کی حفاظت کا ذریعہ سمجھنا چاہیے۔ انہوں نے شہریوں پر زور دیا کہ وہ ٹریفک قوانین پر عمل کرتے ہوئے اپنی اور دوسروں کی جانوں کے تحفظ کو یقینی بنائیں۔
