جہلم: پولیس نے اہم کارروائی کرتے ہوئے عورت کی عفت میں خلل ڈالنے کے مقدمے میں مطلوب ایک اشتہاری مجرم کو گرفتار کر لیا۔
ترجمان جہلم پولیس کے مطابق جہلم میں ایس ایچ او تھانہ سول لائنز اور ان کی ٹیم نے خفیہ اطلاع پر کارروائی کرتے ہوئے مطلوب اشتہاری مجرم کو گرفتار کیا۔ پولیس نے ملزم کی تلاشی کے دوران اس کے قبضے سے 520 گرام آئس برآمد کر کے قبضہ میں لے لی۔
پولیس کے مطابق ملزم کے خلاف تھانہ سول لائنز میں مقدمہ درج کر لیا گیا ہے، جبکہ اس سے مزید تفتیش جاری ہے تاکہ اس کے ممکنہ ساتھیوں اور منشیات کی سپلائی کے نیٹ ورک کے بارے میں بھی معلومات حاصل کی جا سکیں۔
ڈسٹرکٹ پولیس آفیسر (ڈی پی او) شفیق احمد چوہدری نے کہا کہ نوجوان نسل کو منشیات کے ناسور سے محفوظ رکھنا جہلم پولیس کی اولین ترجیحات میں شامل ہے۔ انہوں نے کہا کہ منشیات فروشوں اور معاشرے میں منشیات پھیلانے والے عناصر کے خلاف بلاامتیاز کارروائیاں جاری رہیں گی اور قانون کی خلاف ورزی کرنے والوں کے ساتھ کسی قسم کی نرمی نہیں برتی جائے گی۔
