دینہ: ڈی پی او جہلم نے غفلت اور مبینہ کرپشن پر ڈرائیونگ لائسنس سنٹر دینہ کے انچارج کو معطل کر کے انکوائری کا حکم دے دیا۔
تفصیلات کے مطابق پیر کے روز ڈسٹرکٹ پولیس آفیسر جہلم طارق عزیز سندھو نے ڈرائیونگ لائسنس سنٹر دینہ کا اچانک دورہ کیا۔ پبلک سروس ڈیلیوری میں غفلت اور مبینہ کرپشن سے متعلق موصول ہونے والی شکایات پر انچارج ٹریفک لائسنس سنٹر دینہ فیصل محمود کو فوری طور پر معطل کر دیا جبکہ مکمل شفاف انکوائری ڈی ایس پی انویسٹی گیشن کے سپرد کر دی گئی۔
ڈی پی او جہلم نے دورے کے دوران پبلک سروس ڈیلیوری کے نظام، عملے کے رویے اور شہریوں کو فراہم کی جانے والی سہولیات کا تفصیلی جائزہ لیا۔ انہوں نے موقع پر موجود شہریوں سے براہ راست ملاقات کر کے ان کے مسائل اور شکایات بھی سنیں اور فوری اصلاحی اقدامات کی ہدایات جاری کیں۔
اس موقع پر طارق عزیز سندھو نے کہا کہ عوام کو بلا رکاوٹ، شفاف اور میرٹ پر سہولیات کی فراہمی پولیس کی اولین ذمہ داری ہے۔ انہوں نے واضح کیا کہ پبلک سروس ڈیلیوری میں کسی قسم کی غفلت یا کرپشن ہرگز برداشت نہیں کی جائے گی اور شکایات ثابت ہونے کی صورت میں متعلقہ افسران و اہلکاروں کے خلاف سخت محکمانہ کارروائی عمل میں لائی جائے گی۔
ڈی پی او جہلم نے مزید ہدایت کی کہ ٹریفک لائسنس سنٹر میں سروس ڈیلیوری کو بہتر بنانے، انتظار کے اوقات کم کرنے اور شہریوں کے ساتھ خوش اخلاقی سے پیش آنے کو یقینی بنایا جائے تاکہ عوام کو حقیقی معنوں میں ریلیف فراہم کیا جا سکے۔
