بجلی کے صارفین کو بڑا ریلیف دینے کے حوالے سے خوشخبری سامنے آئی ہے۔
تفصیلات کے مطابق حکومت نے صارفین کو ایک سال میں بلوں کی زیادہ قسطوں کی سہولت دینے کا فیصلہ کیا ہے، جس کے تحت نیپرا نے کنزیومر سروس مینوئل میں ترمیم کی تجویز پیش کی ہے۔
واضح رہے کہ اس ترمیم کا مقصد ڈسکوز کو ریونیو کی ضروریات کے مطابق قسطوں کی سہولت فراہم کرنا ہے۔
نیپرا کی جانب سے کی جانے والی اس تجویز کے مطابق بجلی کے بلوں کی پہلی قسط کی بروقت ادائیگی پر صارفین سے کوئی مارک اپ نہیں لیا جائے گا۔ تاہم ڈسکوز کو بلوں کی قسطوں پر 14 فیصد مارک اپ لگانے کی اجازت ہو گی۔
خیال رہے کہ اس اقدام کا مقصد صارفین کیلئے بجلی کے بلوں کی ادائیگی کو آسان بنانا اور انہیں زیادہ مالی سہولت فراہم کرنا ہے۔
نیپرا نے کنزیومر سروس مینوئل میں ترمیم کی تجویز دینے کے بعد 7 دنوں کے اندر آرا طلب کر لی ہیں۔ اس سے پہلے بھی جون 2024 میں نیپرا نے کنزیومر سروس مینوئل 2021 میں ترمیم کی تھی، جس کے مطابق صارفین کو صرف ایک مرتبہ بلوں کی قسطوں کی سہولت فراہم کی جاتی تھی۔
شہریوں کا کہنا ہے کہ یہ نیا اقدام بجلی صارفین کیلئے ریلیف کا باعث بن سکتا ہے اور انہیں ماہانہ بجلی کے بلوں کی ادائیگی میں زیادہ سہولت حاصل ہوگی۔
