سوہاوہ کے نواحی علاقے میں نامعلوم افراد نے فائرنگ کر کے 50 سالہ شخص کو قتل کر دیا۔
تفصیلات کے مطابق قتل کی یہ افسوسناک واردات جہلم کی تحصیل سوہاوہ کے علاقے ناون کے قریب پیش آئی، جہاں نامعلوم افراد نے فائرنگ کر کے 50 سالہ موٹرسائیکل سوار شخص کو قتل کر دیا۔
پولیس کے مطابق مقتول راشد بٹ ولد معروف بٹ اپنے ڈیرے سے موٹر سائیکل پر گھر جا رہا تھا کہ راستے میں نامعلوم مسلح افراد نے اس پر فائرنگ کر دی، جس کے نتیجے میں وہ شدید زخمی ہوا اور موقع پر ہی دم توڑ گیا۔
واقعے کے بعد ملزمان موقع سے فرار ہو گئے جبکہ پولیس کی نفری فوری طور پر جائے وقوعہ پر پہنچ گئی۔ کرائم سین یونٹ اور فرانزک ٹیمیں شواہد اکٹھے کرنے میں مصروف ہیں۔
پولیس اور ریسکیو 1122 کی ٹیموں نے لاش کو پوسٹارٹم کیلئے تحصیل ہیڈ کوارٹر اسپتال سوہاوہ منتقل کر دیا۔
پولیس کا کہنا ہے کہ واقعہ ذاتی دشمنی کا شاخسانہ ہے یا اس کے پیچھے کوئی اور وجہ ہے، اس حوالے سے تحقیقات کا آغاز کر دیا گیا ہے۔
