یورپ میں کشمیرکاز کیلئے علی رضا سید کی خدمات قابل ستائش ہیں، ڈاکٹر محمد فیصل

برسلز/ لندن: برطانیہ میں پاکستان کے ہائی کمشنر ڈاکٹر محمد فیصل نے یورپ میں کشمیرکاز کیلئے چیئرمین کشمیرکونسل ای یو علی رضا سید کی خدمات کو سراہا ہے۔

چیئرمین کشمیرکونسل ای یو علی رضا سید نے پاکستان کے ہائی کمشنر سے لندن میں ملاقات کی جس میں مسئلہ کشمیر اور خاص طور پر مسئلہ کشمیر کو یورپ میں اجاگر کرنے کے حوالے سے جاری کوششوں پر تبادلہ خیالات کیا گیا۔

ہائی کمشنر ڈاکٹر فیصل نے مسئلہ کشمیر خصوصاً مقبوضہ کشمیر میں انسانی حقوق کے مسائل کو یورپ میں اجاگر کرنے کیلئے چیئرمین کشمیرکونسل ای یو کی کوششوں کو سراہتے ہوئے کہاکہ یہ کوششیں قابل ستائش ہیں۔

انہوں نے علی رضا سید کو ہیومن رائٹس کونسل آف پاکستان کی طرف سے انسانی حقوق کا ایوارڈ ملنے پر مبارکباد دی اور ان کیلئے نیک تمناؤں کا اظہار کیا۔

پاکستانی ہائی کمشنر نے امید ظاہر کی کہ پاکستان میں آئندہ ماہ فروری کے انتخابات کے بعد بننے والی نو منتخب حکومت کے آنے سے مسئلہ کشمیر کو عالمی سطح پر اجاگر کرنے کی کوششوں کو مزید آگے بڑھانے میں مدد ملے گی۔

چیئرمین کشمیرکونسل ای یو علی رضا سید نے کہاکہ مقبوضہ کشمیر کے عوام کی مشکلات دن بدن بڑھ رہی ہیں اور بھارت کشمیر پر اپنا غیرقانونی قبضہ برقرار رکھنے کیلئے مظلوم کشمیریوں پر سنگین مظالم جاری رکھے ہوئے ہے۔

انہوں نے کہاکہ انسانی حقوق کی عالمی تنظیم ہیومن رائٹس واچ کی حالیہ رپورٹ میں مقبوضہ جموں و کشمیر میں بھارتی حکام کی طرف ماورائے عدالت قتل اور کشمیریوں کے بنیادی حقوق کی سنگین پامالیوں کی تصدیق کی گئی ہے۔

علی رضا سید نے مزید کہاکہ جب تک بھارت انسانی حقوق کی پامالیاں روک نہیں لیتا اور مسئلہ کشمیر کشمیریوں کی خواہشات کے مطابق حل نہیں ہوجاتا، ہم یورپ میں کشمیریوں کے حق میں آواز بلند کرتے رہیں گے۔

انہوں نے کہاکہ عالمی برادری کا فرض بنتا ہے کہ وہ مقبوضہ کشمیر میں انسانی حقوق کی خلاف ورزیاں رکوانے اور مسئلہ کشمیر کے پرامن حل کیلئے اپنا مؤثر کردار ادا کرے۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button