جہلم: انسپکٹر جنرل پولیس پنجاب ڈاکٹر عثمان انور اور ریجنل پولیس آفیسر راولپنڈی بابر سرفراز الپا کی ہدایات پر عمل کرتے ہوئے، ڈسٹرکٹ پولیس آفیسر جہلم ناصر محمود باجوہ کی زیر صدارت عوام کے مسائل کے حل کے لیے کھلی کچہریوں کا سلسلہ جاری ہے۔
ڈی پی او جہلم نے تھانہ پنڈدادنخان، تھانہ للِہ، پولیس چوکی کھیوڑہ اور تھانہ جلالپور شریف میں کھلی کچہریوں کا انعقاد کیا، جہاں عوام نے کثیر تعداد میں شرکت کی۔ ڈی پی او نے شہریوں کے مسائل سنے اور ان کے فوری حل کے احکامات جاری کیے۔
کھلی کچہریوں کے دوران شہریوں کو بچوں اور خواتین کی حفاظت اور ہراسگی کے متعلق آگاہی فراہم کی گئی۔ شہریوں نے ان کچہریوں کو عوامی مسائل کے حل کا بہترین ذریعہ قرار دیتے ہوئے ڈی پی او کی کاوشوں کو سراہا۔
اس موقع پر ڈی پی او ناصر محمود باجوہ نے کہا کہ ہم عوام کے مسائل کو ترجیحی بنیادوں پر حل کرنے کی کوشش کر رہے ہیں۔ کھلی کچہریوں کے ذریعے ہمیں عوام کے مسائل براہ راست سننے اور فوری کارروائی کرنے کا موقع ملتا ہے۔ دور دراز علاقوں میں کھلی کچہریوں کا مقصد ان افراد کے مسائل حل کرنا ہے جو شہر آ کر درخواست دینے سے قاصر ہیں۔
پنڈدادنخان سرکل کے تھانوں کا دورہ
کھلی کچہریوں کے بعد ڈی پی او ناصر محمود باجوہ نے تھانہ پنڈدادنخان، تھانہ للِہ، پولیس چوکی کھیوڑہ اور تھانہ جلالپور شریف کا معائنہ کیا۔ انہوں نے تھانوں کی بلڈنگ، فرنٹ ڈیسک، مال خانہ، حوالات اور میس ہال کا جائزہ لیا۔
ڈی پی او نے کہا کہ سرکاری تنصیبات قومی اثاثہ ہیں، ان کی حفاظت ہم سب کی ذمہ داری ہے۔ ایف آئی آر کے اندراج اور زیر تفتیش مقدمات کو جلد از جلد میرٹ پر یکسو کرنا پولیس کی اولین ترجیح ہے۔
اس موقع پر ایس ایچ او تھانہ للِہ اور ان کی ٹیم کو بہترین کارکردگی پر تعریفی اسناد دی گئیں۔ ڈی پی او نے کہا کہ پولیس کی کارکردگی جانچنے کے لیے تھانوں اور دفاتر کے دورے جاری رہیں گے۔
چائینز گارد ایل سی آئی کھیوڑہ کا دورہ
بعد ازاں ڈی پی او جہلم ناصر محمود باجوہ نے چائینز گارد ایل سی آئی کھیوڑہ کا دورہ کیا۔ انہوں نے چائنیز کی رہائش گاہوں اور کام کرنے کی جگہوں کا معائنہ کیا اور سیکیورٹی اقدامات کا جائزہ لیا۔
ڈی پی او نے کہا کہ چائنیز باشندے ہمارے وی آئی پی مہمان ہیں، ان کی سیکیورٹی میں کسی قسم کی غفلت برداشت نہیں کی جائے گی۔ ان کی حفاظت ہمارا قومی فریضہ ہے۔
ڈی پی او نے عوام کو یقین دلایا کہ جہلم پولیس شہریوں کے تحفظ اور مسائل کے حل کے لیے دن رات کوشاں ہے اور مستقبل میں بھی ایسے اقدامات جاری رکھے گی۔
