جہلم پولیس نے دریا، ندی نالوں اور نہروں میں نہانے والوں کے خلاف کریک ڈاؤن کرتے ہوئے دفعہ 144 کی خلاف ورزی پر 8 افراد کو گرفتار کر لیا۔
تفصیلات کے مطابق ڈسٹرکٹ پولیس آفیسر (ڈی پی او) جہلم شفیق احمد چوہدری کی ہدایت پر ضلع بھر میں دریا، ندی نالوں، نہروں اور دیگر آبی گزرگاہوں میں نہانے پر عائد پابندی پر سختی سے عملدرآمد جاری ہے۔ اس سلسلے میں تھانہ صدر اور تھانہ ڈومیلی پولیس نے کارروائیاں کرتے ہوئے دفعہ 144 کی خلاف ورزی کرنے والے مجموعی طور پر 8 افراد کو گرفتار کر لیا۔
ترجمان جہلم پولیس کے مطابق تھانہ صدر پولیس نے کارروائی کرتے ہوئے دریا میں نہانے والے 8 افراد کو گرفتار کیا، جن کے خلاف متعلقہ دفعات کے تحت مقدمہ درج کر لیا گیا ہے۔ اسی طرح تھانہ ڈومیلی پولیس نے بھی کارروائی کرتے ہوئے دریا میں نہانے والے مزید 4 افراد کو گرفتار کر کے ان کے خلاف مقدمات درج کر لیے ہیں۔
پولیس حکام کے مطابق یہ اقدامات شہریوں، بالخصوص نوجوانوں اور بچوں کی قیمتی جانوں کے تحفظ کے لیے کیے جا رہے ہیں تاکہ حالیہ بارشوں اور پانی کے بڑھتے ہوئے بہاؤ کے دوران کسی بھی ناخوشگوار واقعے سے بچا جا سکے۔
ڈی پی او جہلم شفیق احمد چوہدری نے والدین سے اپیل کی ہے کہ وہ اپنے بچوں کو دریا، ندی نالوں اور نہروں میں نہانے سے روکیں اور ضلعی انتظامیہ کی جانب سے نافذ کردہ پابندی پر مکمل عمل کریں۔
انہوں نے واضح کیا کہ دفعہ 144 کی خلاف ورزی کرنے والوں کے خلاف بلاامتیاز قانونی کارروائیاں آئندہ بھی جاری رہیں گی اور کسی کو بھی انسانی جانوں کو خطرے میں ڈالنے کی اجازت نہیں دی جائے گی۔ انہوں نے کہا کہ شہریوں کے جان و مال کا تحفظ جہلم پولیس کی اولین ترجیح ہے اور قانون شکن عناصر کے خلاف بھرپور کریک ڈاؤن جاری رہے گا۔
