پنڈدادنخان: پنجاب بینک پنڈدادنخان برانچ کا لنک مسلسل 20 دنوں سے ڈاؤن، صارفین کو شدید مشکلات کا سامنا۔ شہریوں کو یوٹیلیٹی بلز، اسکول و کالج فیس کی ادائیگی میں دشواری سامنا کرنا پڑ رہا ہے۔
تفصیلات کے مطابق جہلم کی تحصیل پنڈدادنخان میں پنجاب بینک کی برانچ میں مسلسل 20 دنوں سے لنک ڈاؤن ہونے کے باعث صارفین کو شدید پریشانی کا سامنا کرنا پڑ رہا ہے۔ بینک کی سروسز متاثر ہونے سے یوٹیلیٹی بلز، اسکول و کالج کی فیسوں کی بروقت ادائیگی میں مشکلات درپیش ہیں، جبکہ عوام کو دیگر مالیاتی امور کی انجام دہی میں بھی رکاوٹوں کا سامنا کرنا پڑ رہا ہے۔
متعدد صارفین نے بینک انتظامیہ سے مطالبہ کیا ہے کہ پنجاب بینک پنڈدادنخان برانچ میں فوری اصلاحات کی جائیں اور صارفین کی سہولت کے لیے مؤثر اقدامات کیے جائیں۔ صارفین کا کہنا ہے کہ عید کے دنوں میں بھی بینک کی نصب کردہ اے ٹی ایم اکثر اوقات آؤٹ آف آرڈر رہتی ہے، جس سے کیش نکالنے میں شدید مشکلات پیش آتی ہیں۔
شہریوں نے بینک حکام اور متعلقہ اداروں سے مطالبہ کیا ہے کہ پنجاب بینک پنڈدادنخان برانچ میں تکنیکی مسائل کو فوری طور پر حل کیا جائے اور صارفین کو بنیادی بینکنگ سہولیات کی بلا تعطل فراہمی یقینی بنائی جائے۔
